Тулаайах оҕолор босхо сынньана бараллара судургутуйда

Тулаайах уонна көрүүтэ-истиитэ суох хаалбыт оҕолор сонотуоруйга-куруорка чэбдигирэ уонна эмтэнэ, сынньана барар буоллахтарына, путевкалара уонна айаннарын ороскуота толуйуллар. От ыйын бүтүүтэ бырабыыталыстыба мунньаҕар бу боппуруоһу сүрүннүүр докумуоҥҥа уларытыылары киллэрбиттэрэ.

Ол чэрчитинэн, бу өҥөнү ылыы өссө табыгастаах буоларын туһуттан, эппэкиин (попечитель) путевканы судаарыстыбаннай уонна муниципальнай тэрилтэлэртэн эрэ буолбакка, оҕолор сынньанар уонна чэбдигирэр тэрилтэлэрин испииһэктэригэр киирбиттэртэн эмиэ ыллахтарына, харчынан толуйуу (компенсация) оҥоһуллар буолла. Манна тэрилтэ тэриллибит уонна быраабын көрүҥнэрэ оруола суох. Оттон сонотуоруй-куруорт тэрилтэлэрэ лицензиялаах буолаллара ирдэнэр.

Оҕо сынньаммыта, эмтэммитэ 3 ый ааһа илигинэ, путевканы социальнай көмүскэл управлениетыгар, эбэтэр, «Мин докумуоннарым” кииҥҥэ илдьэн бэриллиэхтээх. Оччоҕо путевка сыанатын төнүннэрэллэр.

Саха сиригэр оҕолор сынньалаҥнарынан уонна чэбдигириилэринэн үөрэх, билим министиэристибэтэ дьарыктанар. Маны тэрийэр тэрилтэлэр испииһэктэрин министиэристибэ саайтыгар көрүөххэ сөп.

СӨ үлэҕэ, социальнай сайдыыга министиэристибэтин пресс-сулууспата.