Тула куоракка саха буойуннарын өйдөбүнньүгэр мемориальнай миитин буолла

Тула куоракка Аҕа дойду Улуу сэриитигэр өлбүт саха буойуннарын өйдөбүнньүгэр аналлаах мемориальнай миитин  буолла.

Спасскай кылабыыһаҕа буолбут тэрээһин Аҕа дойду Улуу сэриитигэр Кыайыы 80 сылын  бырааһынньыктааһыҥҥа аналлаах тэрээһиннэргэ дьоһун суолталаах түгэнинэн буолла. Манна РФ Бэрэсидьиэнин иһинэн СӨ Бастайааннай бэрэстэбиитэлистибэтиттэн дэлэгээссийэ кытынна.

«Маннык тэрээһиннэри ыытыы устуоруйа өйдөбүнньүгүн харыстыырга, үүнэр көлүөнэ бэйэтин норуотунан киэн туттарыгар уонна өбүгэлэрин хорсун быһыыларын ытыктыырга  дьоһун суолталаах», – РФ бэрэсидьиэнин иһинэн Бастайааннай бэрэстэбиитэлистибэ салайааччытын солбуйааччы Мария Сафонова иһитиннэрдэ.

Тула уобалаһыгар Аҕа дойду Улуу сэриитин кэмигэр сүүсчэ саха саллаата өлбүтэ. Кинилэр хорсун быһыыларын 2022 сыллаахха саха буойуннарыгар пааматынньык оҥорон үйэтиппиттэрэ. Пааматынньыкка сэрииттэн төннүбэтэхтэр ааттара суруллубута.

Миитин кыттыылаахтара сэриигэ охтубуттары биир мүнүүтэ саҥата суох туран кэриэстээтилэр.