Тулагы-Киллэмҥэ өйдөбүнньүк истиэндэни норуот күүһүнэн туруордулар

Тулагы-Киллэм нэһилиэгэр өрөгөйдөөх Кыайыыны уһансыбыттар сырдык ааттарын үйэтитэр өйдөбүнньүк пааматынньыгы үөрүүлээхтик арыйыы буолла. 

Төрөөбүт дойдутун дьоруойдарын үйэтитэр санааттан, Наталья Борисовна Зотова тобуллаҕас толкуйунан, Сыырдаах сэлиэнньэтин Аҕа дойдуну көмүскээбит уонна тыылга бэриниилээхтик үлэлээбит бэтэрээннэргэ аналлаах өйдөбүнньүк истиэндэни оҥорорго ыҥырыы ыытан, дьону түмэн, олохтоох дьаһалтаны кытта ыкса үлэлэһэн, үтүө түмүктэннэ.

Санаабыт санаатын олоххо киллэрээри «Олимп» хаһаайыстыба салайааччыта Зотова Наталья Борисовна 200 тыһыынча солкуобай харчыны биэрбитинэн, стендэ  тутуллара бырайыакка киирэн, олохтоох дьаһалта истиэндэ турар сирин быһааран, анаабыта. Онтон үп-харчы хомуллан барбыта.

Сылы быһа эргиччи үлэлиир «Саюри» тэпилииссэ хаһаайыстыбата (салайааччы Сергей Александрович Балнайтис) 100 тыһыынча солкуобайы, Сыырдаахтааҕы «Айылгы» оҕо уһуйаана (сэбиэдиссэй Саргылана Семеновна Ушницкая) 67 тыһыынча солкуобайы, «Алмас» маһы таҥастыыр тэрилтэ (дириэктэр Виктор Александрович Мукорез) 3 куб обрезной хаптаһыны биэрбиттэрэ сүҥкэн кылаат буолла. Сэрии, тыыл бэтэрээннэрин оҕолоро, сиэннэрэ уонна олохтоохтор күүс-көмө буоллулар.

Истиэндэ турар сирин бетонунан кутуутун, каркааһын уонна күрүөтүн сыбааркалаан, улахан үлэтин олохтоох ыччат Айсен Неустроев доҕотторун көҕүлээн, буор-босхо оҥорон биэрдэ. Мас уустара Иннокентий Игнатьев, Александр Иустинов таһырдьааҥҥы сценаны аҕыйах күн иһигэр уурбут-туппут курдук оҥорон, олохтоохтор да, оҕолор да үөрүүлэрэ үрдээтэ.

Үөрүүлээх тэрээһини В.С. Дмитриева аатынан «Алгыс» култуура киинэ, М.П. Обутова аатынан киин үлэһиттэрэ тэрийэн ыыттылар. Алгыс сиэрин-туомун  Михаил Николаевич Винокуров ыытта. Ыалдьыттары арыылаах алаадьынан күндүлээтилэр, кырылыыр кымыһынан айах туттулар. Сиэр быһыытынан,  арыйыы кыһыл лиэнтэтин быстылар.

Уоттаах сэриигэ кыргыһан, Кыайыыны аҕалсыбыт биир дойдулаахтарын кэриэстэригэр кыһыл өҥүнэн курдуу баайыллыбыт гирлянданы уурдулар, биир мүнүүтэ саҥата суох сөҥөн турдулар. Хас кэлбит киһи олохторун толук биэрбит дьоруойдар ааттарын үйэтитиигэ дьоһун дьыалаҕа кыттыста, үрдүк үөрүүнү үллэһиннэ.

Эҕэрдэ тылы Наталья Борисовна Зотова, Дьокуускай куорат дууматын депутата Яков Тимофеевич Оконешников, уопсастыбанньык С.П. Шарина  эттилэр.

«Кыайыы күнүн көрсө күндү дьоммут бэтэрээннэрбит — эһээлэргит, эбээлэргит аҕаларгыт, ийэлэргит, таайдаргыт, убайдаргыт, эдьийдэргит ааттарын көмүс суругунан үйэтитэргэ Сыырдаах сэлиэнньэтин олохтоохторо ким харчынан, ким үлэнэн, хас биирдиигит киллэрбит кылааккыт кэлэр көлүөнэ ыччакка холобур буолар. Бүгүҥҥү эдэр уонна орто саастаах көлүөнэ, сэрии уонна тыыл бэтэрээннэригэр, сэрии кэммин оҕолоругар хаһан да төлөммөт сүдү иэстээхпит», — диэн этиини сүрэхтэригэр сөҥөрдүлэр.

Сэрии кэмин оҕолоругар ураты болҕомто ууруллан, дьокутаат Я.Т. Оконешников аатыттан бэлэхтэри туттардылар.

Уопсай хаартыскаҕа түһүү кэнниттэн, сэрии кэмигэр саллааттар сиэбит минньигэс хааһыларынан күндүлээтилэр, кэнсиэр ыытылынна.