Тулагы-Киллэмҥэ саҥа сүүрээн саҕаланна

«Оһуокай тыына — нэһилиэккэ кэскил» диэн Тулагы-Киллэмҥэ саҥа сүүрээн саҕаланна.

Тулагы-Киллэм нэһилиэгэр олунньу ураты суолталанна. Бу күн М.П. Обутова-Эверстова аатынан култуура киинигэр нэһилиэк олохтоохторун түмэр оһуокай туонатын арыллыытын үөрүүлээх түгэнэ буолла.

Тэрээһини Нам Түбэтиттэн анаан ыҥырыынан кэлбит сахалыы ырыа-тойук аргыстаах, алгысчыт Аскалон Лукич — Өркөн Дьол арыйда. Кини киһи иһиттэр истэ туруон курдук ыраас, күүстээх куолаһынан, истиҥ алгыһынан сири-уоту арчылаан, үрдүккэ ыҥырар ырыатынан-тойугунан мустубут дьон сүргэтин көтөхтө. Көҕүлээбит оһуокайа барыбытын биир киһи курдук сомоҕолоото, күүс-сэниэ эбэн биэрдэ.

Бу кэрэхсэбиллээх бырайыак олоххо киирэригэр СӨ үөрэҕириитин туйгуна Августа Семеновна Сидорова уонна култуура киинин фольклорга исписэлииһэ Айсена Аркадьевна Федорова сүрүн көҕүлээччилэринэн уонна тэрийээччилэринэн буоллулар. Кинилэр сыралаах үлэлэрин түмүгэр, нэһилиэккэ өрөбүл күннэргэ дьон-сэргэ үөрэ-көтө тоҕуоруһар, саастаах дьон астына-дуоһуйа сынньанар, билии-көрүү ылар анал түмсүүлэрэ төрүттэннэ.

Оһуокай этээччилэринэн бэйэлэрин холонон көрөн, айылҕаттан айдарыылаах талааннара арыллан эрэр Марианна Моисеева уонна Марфа Прибылых буоллулар. Кинилэр кылыһахтарын мааныта, талба таланнара оһуокайга кэлбит дьону умсугутар, үөрэтэр-такайар. Саҥа талааннар арыллыылара — бу бырайыак биир улахан ситиһиитэ буолар.

Бырайыак ис хоһооно олус киэҥ уонна туһалаах:
• Чөл турук: оһуокайдыах иннинэ анал тыыныы эрчиллиилэр ыытыллаллар.
• Үөрэнии: оһуокай араастарын, кылыһах таһаарыытын баһылааһын.
• Сынньалаҥ: оһуокай кэнниттэн баян тыаһыгар үҥкүү-битии, сахалыы ырыалар дьүрүһүйүүлэрэ.

Нэһилиэкпит аҕам саастаахтара бу тэрээһини олус сөбүлээтилэр. Дьиэҕэ соҕотох олоруохтааҕар, манна кэлэн сэргэхсийэн, бэйэ-бэйэлэрин кытта сэлэһэн, астына-дуоһуйа сынньанан бараллара, үөрэ-көтө сылдьартан чэгиэн туруктаналлара, оһуокайдаан тыллара-өстөрө сайдара, өйдүүр дьоҕурдара тупсара, тылларын-өстөрүн сайыннара таарыйа айарга холонуулара эргиччи туһалаах. Бу биһиги бырайыакпыт сүрүн сыала-соруга.
Оһуокай туоната Тулагы-Киллэмҥэ өрүү аһаҕас буоллун, төрүт тыын аргыстастын!

Светла Попова,

Тулагы-Киллэм.

Хаартыскалар ааптар тиксэриилэрэ.