Тулагы оскуолатыгар буолбут быһылаанынан бэрэбиэркэ ыытыллыбыт

“2024 сыл олунньу 21 күнүгэр, эбиэт кэмигэр Тулагы оскуолатын бастакы мэндиэмэнигэр тиэнньис оонньуу сылдьан 11-с уонна 9-с кылаас үөрэнээччилэрэ иирсиилэрэ охсуһууга тириэрдибитэ быһаарылынна”, — диэн Борокуратуура саайтыгар суруллар.

Ити күн оҕолор хаттаан иирсиилэрин түмүгэр, 11-с кылаас үөрэнээччитэ кырбанан балыыһаҕа киирбит диэн туһааннаах уорган бэлиэтиир.

“Сокуоннай саастарын ситэ илик оҕолор быраабы кэһиилэрин сэрэтии туһунан сокуону кэһии булуллубутунан, ол иһигэр сокуоннай сааһын ситэ илик оҕо доруобуйатыгар эчэйиини ылбытынан, Борокуратуура Дьокуускай куорат уокуруктааҕы дьаһалтатыгар сурук киллэрдэ (көрүүгэ сылдьар)”, — диэн иһитиннэриигэ суруллар.

Доруобуйаҕа ортонон ааҕыллар эчэйиини оҥоруу төрүөтүнэн РФ Холуобунай Кодексын 112-с ыст. 1 ч. тэриллибит холуобунай дьыала силиэстийэ Борокуратуура хонтуруолугар сылдьарын туһунан пресс-сулууспа иһитиннэрэр.