Тулагы уонна Киллэм икки ардыгар оптуобус суолтан туораата

Бэҕэһээ, кулун тутар 26 күнүгэр, Дьокуускайга Тулагы уонна Киллэм икки ардынан айаннаан испит 104 нүөмэрдээх оптуобус суолтан туораабытын туһунан Дьокуускай куорат уокуруктааҕы дьаһалтата иһитиннэрэр. Быһылаан 20:05 чаас саҕана буолбут.

Дьокуускай-Кангаласс-Дьокуускай хайысханан айаннаан испит 104 нүөмэрдээх «ЛиАЗ» мааркалаах оптуобус күн-дьыл туруга мэһэйдээн суолтан туораан хаалбыт. Навигационнай тэрил көрдөрөрүнэн, оптуобус чааска 60 км түргэннээх айаннаан испит.

Ол кэмҥэ оптуобуска 5 пассажир олорсон испит, ким даҕаны эчэйбэтэх. Оптуобус алдьамматах.

Быһылаан тула сулууспа иһинээҕи бэрэбиэркэ ыытыллыаҕа диэн «ЯПАК» иһитиннэрбит.