Тулалыыр эйгэҕитин тупсарар туһугар куоласкытын биэриҥ!

2025 сылга тупсарыллар уопсастыбаннай территорияны талыыга онлайн-куоластааһын 14.gorodsreda.ru саайтка салҕанан бара турар. Бу Арассыыйатааҕы рейтиннээх куоластааһыҥҥа Саха сирэ 67 эбийиэги туруорбут.

“Былырыын бу куоластааһыҥҥа өрөспүүбүлүкэ олохтоохторо 74 690 куолаһы биэрбиттэрэ. Оттон бу сылга РФ  Тутуутун министиэристибэтэ  куоластааһыҥҥа кырата 88 тыһыынча куолас ирдэнэр диэн этэр”, — диэн бэлиэтээтэ СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников. Куоластааһын 2024 сыл муус устар 30 күнүгэр диэри ыытыллыаҕа. Куоластааһын түмүгүнэн “Куораттааҕы  табыгастаах эйгэни оҥоруу” бырагырааматынан бастакы уочарат тупсарыллар эбийиэктэр испииһэктэрэ таҥыллар.
Холобур быһыытынан эттэххэ, бу бырагыраама чэрчитинэн 2023 сылга Таатта улууһун Ытык Күөлүгэр сылы эргиччи  үлэлиир павильоннаах сынньалаҥ паарката, Мииринэйгэ “Иирэлээх” сынньалаҥ сирэ тутуллубуттара. Хас биирдии куоластааччы биир тупсарыыга туруоруллубут эбийиэги талан куолаһын биэрэр, эбэтэр эрдэ талыллыбыт эбийиэк дизайн-бырайыагын талыан сөп. Куоластааһыҥҥа 14 сааһын туолбут өрөспүүбүлүкэ олохтоохторо кыттыахтарын сөп.

Куоластыан баҕалаахтар https://14.gorodsreda.ru/objects саайтка киирэҕит, “Госуслуги” нөҥүө регистрацияланаҕыт уонна сөбүлүү көрбүт эбийиэккитин талаҕыт.

Саха сирэ бу тэрээһиҥҥэ 2018 сылтан кыттыыны ылар. Бу кэм устата 68 уопсастыбаннай уонна 144 тиэргэн иһинээҕи территориялар тупсарыллыбыттара. Сыллата куонкуруска турбут эбийиэктэр ахсааннара элбээн иһэр: 2018 сылга 5 эбийиэк турбут эбит буоллаҕына, ааспыт сылга 50, быйыл 67 эбийиэк куоластааһыҥҥа турда.