Тулуна олохтоохторо бырабыыталыстыба үлэтин сөптөөҕүнэн сыаналаатылар

Бүгүн Уус Алдан улууһугар өрөспүүбүлүкэ ситэриилээх былааһын отчуота саҕаланна.

Тутууну хонтуруоллуур управление салайааччыта Павел Аргунов салайар үһүс бөлөҕө отчуоту аан бастаан Тулуна сэлиэнньэтиттэн саҕалаата. Ааспыт сыллааҕы өрөспүүбүлүкэ олоҕун-дьаһаҕын билиһиннэрэр дакылаат кэнниттэн нэһилиэнньэни кытта кэпсэтиигэ киирдилэр. Дьэ тугу сүрүннээн Тулуна нэһилиэнньэтэ туруоруста?
Бастакы туруорсуу ититии туһунан буолла. Чуолаан хочуолунай боппуруоһа, ОДьХ тутар дуу, чааһынай киһи дуу? Чааһынай киһи тутарга бэлэм да, үбүлээһинэ моһуоктаах. Онон маһынан, чоҕунан оттунан олорор ыаллар бу кыһалҕаҕа элбэхтик этиннилэр. Манна биир барыйаан быһыытынан убаҕас гааһы киллэриини көрүөххэ сөп диэтилэр.

Быйыл Суоттуга пилотнай бырайыак быһыытынан 20 ыал кыстаан олорор. Онон ити бырайыак бэйэтин үчүгэй өттүнэн көрдөрдөҕүнэ, Тулуна биир кыһалҕата быһаарыллыан сөп эбит.
Сэлиэнньэ социальнай тутуулара эргэрбиттэр, врачебнай амбулатория, култуура дьиэтэ саҥа тутууну, оскуола хапытаалынай өрөмүөнү эрэйэллэр. Олохтоохтор амбулаториялара 103 уочаракка турарын истэн хомойдулар. Ол гынан баран, РФ Доруобуйаҕа харыстабылын министиэристибэтэ нормативка уларытыы киллэрдэҕинэ, түргэнник хомуллар модульнай эбийиэккэ амбулатория арыллыан сөп. Оччотугар сылга 30-60 да эбийиэк үлэҕэ киирэр кыахтаах.
Кэтэх сылгы төбөтүгэр 5 тыһ. солк көрүллүө дуо диэн ыйытыыга, быһаччы аккаас этилиннэ.
Култуура дьиэтин тутуу ханнык бырагырааманан барыан сөбүй диэҥҥэ, «Үтүө дьыала» өрөспүүбүлүкэтээҕи хамсааһын чэрчитинэн эрэ барыан сөп диэн сүбэлээтилэр. Саҥа эбийиэктэри тутууга бу тэрилтэ 1 млрд 200 тыһ. солк.үбү биэрэргэ сайаапка биэрбит.
Ситинник чааһынай киһи хотон туттарыгар көмөнү хантан ылыан сөбүн ыйыталастылар, алын кылаастарга саха тылын чааһын элбэтэри, Кыайыы 80 сылынан Волгоградка Мамаев кургаҥҥа Саха сирин аатыттан мемориальнай өйдөбүнньүк туруон наадатын туруорустулар.

Отчуот түмүгүнэн Тулуна олохтоохторо СӨ бырабыыталыстыбатын 2024 сыллааҕы үлэтин сөптөөҕүнэн сыаналаатылар.