Туматтан көстүбүт дьикти булумньулары чинчийдилэр

Муус үйэтинээҕи кэмҥэ төрөөн-үөскээн ааспыт ыттар оҕолорун өлүктэрин булан тураллар. 

Британия Йоркскайдааҕы университета М.К.Аммосов аатынан ХИФУ учуонайа Сергей Федоров көмөтүнэн, Туматтан көстүбүт былыргы үйэтээҕи ыттар оҕолорун криомумияларын чинчийбиттэр. Итиэннэ бу аныгы үйэ сиэмэх кыылларыгар майгылаабат хара түүлээх бөрө оҕолоро диэн быһаарбыттар.

Чинчийээччилэр бу ураты булумньулар иккиэн биир ийэттэн төрөөбүттэрин чопчулаабыттар.  Бөрө оҕолоро түүлээх носорогунан аһаабыттара интэриэһиргэппит.

Санатар буоллахха, Усуйаана оройуонугар Тумат сэлиэнньэтин таһыттан 2011 уонна 2015 сс. бу дьикти булумньулар көстөн тураллар. Бастаан былыргы ыт оҕолорун өлүктэрэ (мумиялара) диэн быһаарбыттара. Булумньулар, быһа барыллаан — 14,4 тыһ. сыллар анараа өттүлэринээҕилэр. Уратылара — бачча өр кэмҥэ олус үчүгэйдик сыппыттара буолар. Муннуларыттан кутуруктарын төбөтүгэр тиийэ баара ордук сөхтөрбүт.

Сиһилии https://www.sakha.gov.ru/news/6543 манна ааҕыҥ

СӨ Ил Дарханын уонна Бырабыыталыстыбатын пресс-сулууспата