Тумулга Доллу төрөөбүтэ 75 сыла бэлиэтэннэ

Бэс ыйын 26 күнүгэр Мэҥэ Хаҥалас Доллу нэһилиэгэр Тумулга Степан Николаевич Сивцев-Доллу төрөөбүт дойдутугар ахтыы күнэ буолан ааста. Степан Николаевич Сивцев-Доллу Саха сирин үтүөлээх артыыһа, Арассыыйа бочуоттаах кинематограба, П.А Ойуунускай аатынан бириэмийэ лауреата, Мэҥэ Хаҥалас бочуоттаах олохтооҕо.

Бу күн сарсыарда эрдэттэн болдьоспут курдук, күнэ чаҕылыйан, сайын үтүөтүн чээлэй күөххэ сөрөөн, олус үчүгэй күн туран биэрдэ. Майаттан биһиги, “Таммахтар” Августина Владимирова-Хабарова, Елизавета Попова-Бааттаах Кырата, Инна Николаева-Угинка үһүө буолан сыыйыллар аспаал суолунан чэпчэкитик айаннатан тиийдибит. Балыктаахтан “Таммахтар” чилиэннэрэ Анисья Скрябина-Сайда, Саргылана Стручкова-Ымыычаана, Сардана Стручкова, Төҥүлүттэн “Таммахтар” Лидия Андросова, Марфа Сидорова, ону таһынан Төҥүлүттэн “Айар Кут” литературнай түмсүү Елена Петровна Борисова салайааччылаах Иван Стручков, Иван Тарабукин, Октябрина Григорьева, Галина Ноговицына, Мария Апросимова, Матрена Варламова күүтүүлээх мааны ыалдьыт буолан кэллилэр. Тупсаҕай тутуулаах култуура дьиэтин үлэһиттэрэ итии үүттээх чэйдээх, минньигэс алаадьылаах үөрэ-көтө көрүстүлэр. Ол кэннэ биир хоһу баһылыыр баай экспонаттардаах, «Ретро-түмэли” кулууп дириэктэрэ Акулина Силиновна Власова сиһилии кэпсээн билиһиннэрдэ, кэритэ сылдьан көрдөрдө.

Дьэ, уонна көрүдүөргэ киэҥ нэлэмэн биир саалаҕа нэһилиэк убаастыыр, киэн туттар киһитигэр Сивцев Степан Николаевич-Доллуга анаммыт, артыыс чаҕылхай олоҕун бары кэрдиистэрин сырдатар хаартыскалардаах быыстапка туруоруллубута кэлбит дьону дуоһута астыннарда.

Ахтыы күн былааннаммыт чааһыгар үөрүүлээхтик арыллан күө-дьаа уон чааска саҕаланна. Тэрээһин бастакы чааһын “Таммахтартан” Августина Хабарова ыытта, кэлбит дьону үөрүүлээх күнүнэн эҕэрдэлээн, билиһиннэрэн баран, тылы Доллу кэргэнигэр, тыл билимин дуоктарыгар, бэрэпиэссэригэр, ХИФУ научнай үлэһитигэр, учууталыгар Прасковья Сивцеваҕа-Максимоваҕа. Прасковья Васильевна олус холку, намыын-намчы куолаһынан кэргэнин Степан Николаевич олоҕуттан сырдык ахтыылары арыйан кэпсээтэ.

Ол кэннэ ыҥырыылаах ыалдьыттар, “Таммахтар” ааптардара тахсан бэйэлэрин билиһиннэрэн, хоһооннорун өйдөрүттэн аахтылар, сахалыы- нууччалыы хоһооннор сааланы ытыс тыаһа доҕуһуоллаах дуорайдылар. Прасковья Васильевна тыл идэлээх сүдү киһи быһыытынан “Таммахтарга”, махтал тылынан хайҕаан, өссө да айар үлэбитигэр иннин диэки кимэн, араас хоһоон ньымаларын баһылаан үүнэн-сайдан иһэрбитигэр баҕа санаатын эттэ, тыл күүһүн, баайын, кистэлэҥин, алыптааҕын туһунан үгүс элбэх сүбэлэри биэрдэ. Ахтыы бастакы чааһа Тумул оскуолатын оҕолоро устубут уон тэттик киинэлэрин көрүүтүнэн түмүктэннэ. Бу тэттик киинэлэргэ күрэх биллэриллибитинэн, Тумул нэһилиэгин анал наҕараадалара олохтоммут.

Күнүс икки чаастан ахтыы иккис чааһа үөрүүлээх быһыыга арылынна, манна Тумул нэһилиэгин баһылыга Николай Прокопьевич Сивцев, Мэҥэ Хаҥалас улууһун баһылыгын бастакы солбуйааччы Василий Васильевич Михайлов, Мэҥэ Хаҥалас улууһун култуураҕа уонна духуобунай сайдыыга салалтатын салайааччыта Анна Руслановна Исакова, Мэҥэ Хаҥалас улууһун суруйааччыларын “Таммахтар ”холбоһук салайааччыта Наталья Гаврильевна Пахомова, “Таммахтар” үтүө сүбэһиттэрэ Августина Семеновна Хабарова үтүмэн эҕэрдэ уонна махтал тыллары эттилэр, ону кытта Прасковья Васильевнаҕа сэмэй бэлэхтэрин, сибэкки дьөрбөтүн туттардылар.

Сыанаҕа Степан Васильевич-Доллу тылларыгар суруллубут Гиимин оскуола оҕолорун толоруутугар ньиргийдэ, ырыа-үҥкүү дьиэрэйдэ. Степан Васильевич-Доллу оскуолаҕа бииргэ үөрэммит үөлээннээхтэрэ сыанаҕа тахсан ахтан-санаан тыл эттилэр. Манна даҕатан эттэххэ, Төҥүлү биллэр поэтессата, “Таммахтар” биир тарбахха баттанар киһибит, Саха Өрөспүүбүлүкэтин Суруйааччыларын сойууһун чилиэнэ Лидия Андросова Доллуну кытта биир кылааска үөрэммиттэр эбит. Кини билигин да бииргэ үөрэммит эйэлээх кылааһынньыктарын түмэн иилээн-саҕалаан илдьэ сылдьарын көрөн олус үөрдүбүт уонна киэн тутуннубут.

Степан Николаевич Сивцев-Доллу, кырдьык да, сырдык чаҕылхай олоҕу олорон ааспытын туһунан бүгүн элбэхтик кэлбит дьон-сэргэ ахтыытыттан этилиннэ. “Сахацирка” олугун уурбут, саха дьоҕурдаах, талааннаах оҕолорун мунньан Кытай дойдутугар ыытан үөрэттэрбит, “Сахафильм” суолун сахпыт, дьиҥнээх саха киинэтин олохтообут, Саха сирин үтүөлээх артыыһа дойдутугар улахан өҥөлөөх, убаастабыллаах киһибит аатыгар сүгүрүйэн ахтан-санаан, кини аатын үйэтитэн бүгүн 75 сааһын туолбут күнүгэр истиҥник бэлиэтэммитэ хайҕаллаах уонна тоҕоостоох.

Үтүө тэрээһин түмүгэр Степан Николаевич-Доллу дьиэ кэргэнэ Прасковья Васильевна, уоллара кардиолог-быраас идэлээх Василий Степанович Сивцев кэргэниниин, икки кыыс оҕолорунуун сыанаҕа тахсан махтанан, Социалистическай үлэ дьоруойа Т.Г. Десяткин аатынан Тумул орто оскуолатын быйыл 11 кылааһын бүтэрбит Титова Дарианнаҕа уонна Төҥүлүтээҕи Шахурдин А.С аатынан орто оскуоланы бүтэрбит Иванна Павловаҕа туйгун көрдөрүүлэрин иһин үөрүүлээх быһыыга майгыга харчынан истипиэндьийэни туттардылар.
Степан Николаевич Сивцев-Доллу норуотугар оҥорбут үтүөтэ инникитин махталынан ахтыллыа да буоллаҕа!