Тумулга саҥа оскуола-саад тутуллуо

Уус Алдан улууһугар Тумулга саҥа оскуола-саады тутуохтара. Бу туһунан улуус дьаһалтатын пресс-сулууспата иһитиннэрдэ.

Сэргэх сонунтан Тумул олохтоохторугар үөрүү өрөгөйдөөтө. Ол курдук, күүтүүлээх саҥа оскуола эбийиэгин тутуу үлэтин саҕалыыр туһунан хантараакка илии баттанна.

Тумул орто оскуолатын 1965 сыллааҕы эргэ эбийиэгэ 2014 сыллаахха саахалланар туруктаах буолан көтүрүллүбүтэ. Онтон ыла бу күҥҥэ диэри оҕолор хас да сиринэн үөрэнэн кэллилэр.

Тутуллуохтаах саҥа эбийиэк «СӨ үөрэҕи сайыннарыы» тус сыаллаах бырагыраама чэрчитинэн,  оскуола 90 оҕотугар,  оҕо уһуйаанын 40 иитиллээчитигэр ананан, 2024 сылга диэри тутуллуоҕа. Кыһа былааннаммытынан 3228,48 кв.м. уопсай иэннээх, икки мэндиэмэннээх буолар. Эбийиэги «АДГЕЗИЯ» хааччахтаммыт эппиэтинэстээх тэрилтэ тутуоҕа.

Улуус дьаһалтатын пресс-сулууспата.