Тумууга туһалаах арыы

Күһүн буолан, тумуу, дьаҥ элбээтэ. Ыалдьыбат туһуттан, туһалаах, тумууттан харыстыыр арыыны оҥостон сииргитигэр сүбэлиибит.

1 ыстакаан чеснок ыраастаммыт өлүүскэлэрин уонна ыстакаан кыра аҥаарынан үүнээйи арыытын (оливковай арыы ордук) блендергэ эрийтэрэбит. Манна имбиир ыраастаммыт, кырбаммыт кыра куһуоктарын эбиэххэ сөп.

Чеснок илдьирийэн, арыы үллэн, маҥхайан тахсар, пааста курдук буолар. Бүттэ. Бу арыыны бааҥкаҕа кутан, хаппахтаан баран, халадыынньыкка уура сылдьан, килиэпкэ сыбаан сииллэр, тума курдук аска кутан, минньитэллэр. Бу арыы син өр хараллыан сөп эрээри, сии үөрэннэххэ, тута бүтэр.

Чеснок тумууга эрэ туһалаах буолбатах, хааны ыраастыыр, иммунитеты күүһүрдэр, холестерины, дабылыанньаны  түһэрэр, тымырдары бөҕөргөтөр, ас буһарар уорганнар, мэйии үлэтин тупсарар, токсиннары таһаарар, организмы чэбдигирдэр ураты дьайыылаах.

Чеснок сытын сүтэрэргэ петрушканы, мээтэни, дьаабылыканы, йогурду сиэххэ, лимоннаах чэйи, эбэтэр, үүтү иһиэххэ сөп. Илиигин суодалаах уунан сууннахха, чеснок сыта сүтэр.