Туобуйа – Быракаан – Өргүөт – доҕордуу көрсүһүүтэ

Үөһээ Бүлүү улууһун ыраах сытар Туобуйа нэһилиэгэр ыаллыы сытар Туобуйа – Быракаан – Өргүөт нэһилиэктэрин олохтоохторо «Доҕордуу көрсүһүүлэрэ» буолан ааста.

Икки сыл анараа өттүгэр Туобуйа – Быракаан – Өргүөт нэһилиэктэрин култуура үлэһиттэрэ, бары сүбэлэһэн хас сылын аайы нэһилиэктэринэн сылдьан, дьоммутун-сэргэбитин сэргэхситэр сыаллаах, саҥа сүүрээни киллэрэн  “Доҕордуу көрсүһүүнү” тэрийэргэ диэн сүбэлэспиппит.

Бастаан саҕалыырбытыгар Туобуйа нэһилиэгэ Быракаан нэһилиэгэр көрсүспүттэрэ. Ол кэнниттэн Өргүөт, Быракан нэһилиэктэрэ кыайан кэлбэккэ көрсүһүү буолбатаҕа. Онтон бу үүммүт Саҥа 2026  сыл Арассыыйаҕа –Сомоҕолоһуу, Саха сиригэр – Култуура сылынан биллэриллибитэ. Онно олоҕуран култуура эдэр үлэһиттэрин көҕүлээн, быйылгы Сомоҕолоһуу уонна Култуура сылын, үс нэһилиэк бары биир сомоҕо күүс буолан, саҥа сылы көрсөргө диэн этии  киллэрбитим.

Быракан уонна Өргүөт нэһилиэктэрэ, биһиэхэ Туобуйа нэһилиэгэр кэлэн «Доҕордуу көрсүһүүбүтүн» тэрийдибит. Туобуйа – Быракаан – Өргүөт нэһилиэктэрэ хамаанданан волейболга, тиэнискэ уонна «Веселые старты» көрүҥнэргэ күрэхтэстилэр.

Волейболга, тиэнискэ тыҥааһыннаах, тириитиилээх-хорутуулаах  киирсиилэр буоллулар. Күрэх уопсай түмүгүнэн Өргүөт нэһилиэгин хамаандата 1 миэстэни ылан кыайыы өрөгөйүн биллэ уонна  анал кубогын тутта. Онон көһө сылдьар Кубок иккис төгүлүн Өргүөт нэһилиэгэр барда. Онтон иккис бириистээх миэстэни Быракаан нэһилиэгэ ылла, үһүс Туобуйа нэһилиэгэ буолла.

Киэһэ өттүгэр үс нэһилиэк холбоһон эҕэрдэ кэнсиэр туруордубут. Ол кэнниттэн нэһилиэктэринэн маассабай оонньуу ыытылынна. Онон ыраах Туобуйа нэһилиэгин олохтоохторо олус сэргэхсийдилэр.

Түгэнинэн туһанан, Туобуйа – Быракаан – Өргүөт нэһилиэктэрин култуура үлэһиттэригэр, бу тэрээһиҥҥэ кэнсиэркэ, күрэххэ көхтөөх кыттыыны ылбыт актыбыыс уонна ыалдьыттары көрсөргө ас астаһан көмөлөспүт дьоммутугар   барҕа махтал тылларын тиэрдэбит. Күндү дьоммут чэгиэн эрэ буолуҥ, өрүү маннык биир санаанан сомоҕолоһон, түмсүүлээх  буолуоҕуҥ

Туобуйа – Быракан – Өргүөт нэһилиэктэрин доҕордоһуута өссө бөҕөргөөтүн маннык көрсүһүүлэр тиһигин быспакка ыытылла турдуннар. диэн баҕа санаам бастыҥын этэбин. Ким доҕордоох – ол дьоллоох!

 

Зинаида Абрамова,

Туобуйатааҕы КСК «Сайдам»  уус-уран салайааччыта