Туобуйаҕа «Таптал уонна бэриниилээх буолуу иһин» мэтээл Сидоровтарга туттарылынна

Бэҕэһээ, олунньу 18 күнүгэр, Үөһээ Бүлүү улууһун Туобуйа нэһилиэгэр Бырабыыталыстыба отчуота ыытыллыбыта.

Улуус саамай кытыы сытар сиригэр, Туобуйа нэһилиэгэр, бырабыыталыстыба отчуотун кэмигэр тиийбит оробуочай бөлөх салайааччыта, СӨ Бырамыысыланнаска уонна геологияҕа миниистири солбуйааччы Антон Андросов уонна улуус баһылыгын социальнай боппуруостарга, дьиэ кэргэн бэлиитикэтигэр солбуйааччы Анна Уларова, нэһилиэк баһылыга Гаврил Лазарев Туобуйа биир кырдьаҕас, ытыктанар, элбэх оҕолоох ыалыгар Варвара Игнатьевна уонна Михаил Афанасьевич Сидоровтарга Ил Дархан Бочуотунай Грамотатын уонна «Таптал уонна бэриниилээх буолуу иһин» мэтээли туттардылар.

Үөһээ Бүлүү улууһугар ситэриилээх былаас уорганнарын көһө сылдьар отчуота олунньу 18 күнүттэн саҕаламмыта. СӨ Бырабыыталыстыбатын бэрэссэдээтэлин бастакы солбуйааччы Дьулустаан Борисов салайааччылаах оробуочай бөлөх чилиэттэрэ үс бөлөҕү тэрийэн, оройуон бары нэһилиэктэригэр үс күн устата сылдьыахтара.

Саха сирин бырабыыталыстыбатын отчуота олунньу 3 күнүгэр саҕаланан, кулун тутар ыйга диэри салҕанан ыытыллыа. Саха сирин олохтоохторо бу кэмҥэ долгутар ыйытыктарын биэриэхтэрин уонна сиһилии хоруйдары ылыахтарын сөп.