Бу күннэргэ Үөһээ Бүлүү улууһун Туобуйа нэһилиэгин дэлэгээссийэтэ, кинилэртэн оруобуна 200 км ыраах сытар, суола-ииһэ букатын суох Өлүөхүмэ улууһун Хоро нэһилиэгэр «Бөлөрүүс» тыраахтар арыалланан, икки УАЗ-гынан ыраах айаҥҥа туруммуттар.
Дьэ итиччэ ыраах уонна адьас суола-ииһэ суох, этэргэ дылы, былыр соломмут оһон эрэ бырасыакаларынан тоҕо да дугуйданнылар диэххит. Өрдөөҕүттэн туобуйалар уонна хоролор билсэллэр, ыаллаһаллар эбит. Икки өттүттэн аймахтара элбэхтэрэ иһиллэр. Маны этэн эрдэхтэрэ, хаан тардыһыылаах диэн.
Туобуйа дэлэгээссийэтэ мээнэҕэ ыраах аттамматах. Ахсынньы 1 күнүгэр Хороҕо Элбэх хайысхалаах духуобунас, култуура уонна успуорт киинэ аһыллыытыгар кыттардыы эрдэ айаннаабыттар эрээри, хомойуох иһин, суол мөлтөх буолан уонна бөлөрүүстэрэ аара алдьанан хойутаан тиийбиттэр. Оруобуна балтараа суукка кэриҥэ айаннаабыттар.
Хоро култууратын киинин дириэктэрэ Марина Габышева: «Хоролор уонна туобуйалар доҕордоспуппут ыраатта. Бу шефтэһиини көҕүлээччинэн Туобуйаттан төрүттээх Хороҕо өр сылларга олорон учууталлаабыт ытык-мааны киһибинэн Афанасий Яковлев буолар. Кинилэр аймахтара биһиэхэ элбэхтэр. Култуура саҥа дьиэтэ үлэҕэ киирэр үтүөкэннээх тэрээһиҥҥэ төһө да хойутаан кэллэллэр тута кыттан барбыттара. Тоҕус буолан, икки массыынанан өр уонна букатын суола-ииһэ суох суолунан сууккаттан ордук кэм айаннаабыттар. «Бөлөрүүс» арыаллаабыт. Сарсыныгар төгүрүк остуол тэрийэн, араас боппуруоска уопут атастаһыыта буолбута. Ону тэҥэ, «Туобуйа уонна Хоро» диэн ааттаах бары кыттыһан, бэртээхэй кэнсиэри туруорбуппут.
Кинилэр бүгүн, ахсынньы 4 күнүгэр, сарсыарда 6 чааска дойдуларыгар туруммуттара. Этэҥҥэ айанныылларыгар баҕарабыт. Түгэнинэн туһанан, туобуйаларга бу саҥа дьиэбит үлэҕэ киирэр үтүөкэннээх тэрээһиҥҥэ ити айылаах тоҥуу хаары хайытан уһун-унньуктаах айаны айаннаан кэлэн, эҕэрдэ, алгыс бастыҥын этэн барбыттарыгар ис сүрэхпититтэн махтанабыт. Бу шефтэһиибит үйэлэри уҥуордууругар баҕарабыт. Биһиги, хоролор, Туобуйаҕа халлаан сылыйан, күн уһуур кэмигэр саас тиийээччибит«, — диэн кэпсээтэ.
Туобуйалар бүгүн сарсыарда эрдэ арахпыттар. Ол аата билигин айан бөҕөтүн айаннаан истэхтэрэ. Этэҥҥэ дойдуларын буллуннар диэн алгыс тылларын этэбит.
Бүгүн, ыам ыйын 9 күнүгэр, Дьокуускайга сылын аайы ыытыллар Кыайыы Оһуокайа үрдүк таһымнаахтык буолла. Быйыл…
Саха сиригэр Мэҥэ Хаҥаласка уонна Өлүөхүмэ оройуоннарыгар сүппүт эр дьону көрдүүллэр. Ааспыт сууккаҕа атын оройуоннарга…
Арассыыйа Дьоруойа Андрей Григорьев Москваҕа Кыайыы параадыгар кытынна. Кини ыҥырыылаах ыалдьыт быһыытынан олорорун "Бастакы" ханаалга…
Ыам ыйын 5 күнүгэр, Пушкин аатынан киин библитиэкэҕэ Үөһээ Бүлүү Балаҕаннааҕыттан төрүттээх, билигин Нам Түбэтигэр…
Таатта улууһун киинигэр Улуу Кыайыы 80 сыллаах үбүлүөйүн көрсө "Кыайыы көтөллөөх буойун учууталлар көмүс уруоктара"…
edersaas.ru саайт 2020 сыллаах архыыбыттан. Кыайыы 75 сылынан эһээм кэпсээниттэн тугу өйдөөн хаалбыппын суруйарга быһаарынным.…