«Туой Хайа» куонкурус-бэстибээл эдэр кыттааччылартан сайаапкалары күүтэр

Олунньу 8 күнүгэр саха эстрадатын ырыатын эдэр толорооччуларын «Туой Хайа-2023» өрөспүүбүлүкэтээҕи XXXI бэстибээл-куонкурус дьүүллүүр сүбэтэ 8-тан үөһээ саастаах оҕолортон сайаапкалары хомуйууну саҕалаата.

Үс сыллааҕыта бэстибээли тэрийээччилэр куонкурус хабаанын кэҥэтэн, оҕолорго туспа кытталларыгар кыаҕы биэрбиттэрэ. 100 000 солкуобай суумалаах сүрүн бириис иһин 8-17 саастаахтар киирсиэхтэрин сөп. 2022 сыллаахха оҕолор куонкурустарыгар 94 артыыс кыттыбыта. Гран-прины Дьокуускай куораттан Сайаана Неустроева ылбыта (салайааччы Станислав Олесов).
Тэрийээччилэр бэлиэтииллэринэн, дьүүллүүр сүбэ инникитин сулус буолар кэскиллээх кыттааччылары кыраҕы хараҕынан булан ылар. Быйыл дьүүллүүр сүбэ бэрэссэдээтэлинэн саха эстрадатын сулуһа, Саха сирин үтүөлээх артыыһа Павел Семенов үлэлиэҕэ. Ону таһынан хамыыһыйа састаабыгар Антон Иванов, Дария Лаврова, Ай-Куота Степанова уонна Роза Раянова бааллар.
Куонкурус-бэстибээлгэ биирдиилээн, икки, үс буолан толорооччулар уонна кэлэктиибинэн толорооччулар кыттыахтарын сөп.
Бэйэҥ сулускун умат! Сайаапкалары Tuoj-Haya@alrosa.ru. электроннай почтаҕа ыытыахха сөп. Оҕолортон сайаапкалары ылыы олунньу 22 күнүгэр диэри уһатылынна.
Сиһилии иһитиннэриини https://ksk.alrosa.ru/events/14/799/ саайтка билсиэххэ сөп.

АЛРОСА пресс-сулууспатын хаартыската