Туой Хайа туһунан айымньылаах ааптардардыын атах тэпсэн олорон

От ыйын 13 күнүгэр Мииринэй куоракка эстрада ырыатын толорооччулар уонна айар кэлэктииптэр «Туой Хайа Фест-2025» өрөспүүбүлүкэтээҕи бэстибээл-куонкурустара тэрилиннэ.

Бу 32-с бэстибээл-куонкурус чэрчитинэн, «Триумф» стадиоҥҥа бэйиэт, прозаик, тылбаасчыт, СӨ Суруйааччыларын сойууһун чилиэнэ Августина Лонкунова айар үлэтигэр аналлаах литературнай көрсүһүү буолла. Кэрэхсэбиллээҕэ диэн, манна биир дойдулаахтара, Туой Хайа туһунан айымньылардаах, СӨ Суруйааччыларын сойууһун чилиэнэ, өр сылларга суут эйгэтигэр үлэлээбит Михаил Иванов-Чуона Мэхээлэ ыалдьыттаата.

Августина Яковлевна иһитиннэрбитинэн, көрсүһүү олус истиҥник уонна киэҥ хабааннаахтык ааста.

«Остуолга сибиэһэй сүөгэй, дьэдьэн барыанньата, алаадьы, минньигэс лэппиэскэ, кымыс, саха киһитигэр астык үүттээх чэй тардылынна. Ити барыта элбэх киһи хамсааһыныттан тахсар. Аймахтарбын, Уйбаан Гаврильевич кыыһын, сиэнин кытары билистим. Тэрээһиҥҥэ Чуона Мэхээлэ кэлбититтэн бары астынныбыт. Кэргэнэ бэйэтин хоһоонун аахта. Бэртээхэй кэпсэтии буолла. Дьон Чуона уонна мин кинигэлэрбин хамаҕатык атыыластылар. Онон иккиэн туой хайалары, куорат олохтоохторун кытары көрсөн,  дойдубут Туой Хайа туһунан ахтан-санаан аастыбыт», -– диэн төрөөбүт дойдуларын аатын илдьэ сылдьар улахан бэстибээл кыттыылаахтарыгар эҕэрдэтин, тэрийээччилэргэ махталын тириэртэ.

Августина Лонкунова талааныгар сүгүрүйээччилэр кини хоһооннорун ааҕыы куонкуруһугар кыттан, ааптартан бириистэри туттулар.

Көрсүһүү кыттыылаахтара айар талааннаах биир дойдулаахтарыгар төрөөбүт дойдуларын  дьылҕатын ахтан-санаан, үйэлээх айымньыларыгар киллэрэн эдэр көлүөнэҕэ умнуллубат өйдөбүнньүгү иҥэрэллэригэр ис сүрэхтэриттэн махтаннылар.