Туораан биэрбэккэ, арыгы иһэн баран…

Ааспыт өрөбүллэргэ Дьокуускай куорат сиригэр-уотугар суол-тырааныспар 14 быһылаана бэлиэтэммит. Итинтэн бииригэр икки киһи эмсэҕэлээбит.

Олунньу 9 күнүгэр 22 чаас диэки Винокуров уонна Лонгинов уулуссаларын быһа охсуһуутугар, «Тойота-Карина» массыынаны ыытан испит 60 саастаах киһи  «Ниссан Авенир» көлөҕө суолун туораан биэрбэккэ харсыспыттар. Ол түмүгэр, Ниссан суоппара уонна олорсон испит киһи араас эчэйиини ылбыттар.

Өрөбүл күннэргэ арыгы иһэн баран массыына ыыппыт 13 киһини Госавтоиниспиэксийэ үлэһиттэрэ туппуттар. Биллибитинэн, итинтэн икки киһи итирик туруктаах сылдьан массыынаны хаттаан ыыппыттар.

Арыгы иһэн баран массыынаны ыытар дьон суолга улахан кутталы үөскэтэллэр. Бу бэйэлэригэр эрэ буолбакка, атын дьоҥҥо кытары кутталлаах.

Олунньу 9 күнүгэр киэһээ, быһа холоон 21 чааска, Ильменскай уонна Винокуров уулуссаларын быһа охсуһуутугар 52 саастаах эр киһи «Мазда Демио» массыынаны ыытан иһэн, суолга утары тахсан, «Тойота Ленд Крузер Прадо» массыынаны кытары харсыспыт. Эмсэҕэлээбит суох.

Госавтоиниспиэксийэ суол быраабылатын тутуһаргытыгар ыҥырар.

https://t.me/ogibdd14