Хаартыска Готовцевтар архыыптарыттан
Хаҥалас улууһун Өктөм нэһилиэгэр үһүс кылааһы бүтэрбит оҕо туорт оҥорон атыылыырын туһунан сураҕы олус сэргии истибитим. Кимнээх оҕолоро туорт оҥорор буоллаҕай диэн сураспытым, Сахаяна Руслановна уонна Александр Петрович Готовцевтар диэн алта оҕолоох эдэр дьиэ кэргэн төрдүс оҕолоро эбит. Эркин билигин 10 саастаах, нэһилиэгэр сакааска торт оҥорон атыылыыр.
Бүгүн Эркин Готовцевы кытта кэпсэтиибин билиһиннэрэбин.
— Эркин, төрөппүттэриҥ, бииргэ төрөөбүттэриҥ туһунан кэпсээ. Хаһааҥҥыттан ас астыырга холонор буолбуккунуй?
— Мин ыал төрдүс оҕото буолабын. Быйыл төрдүс кылааска киирэбин. 11 сааспын туолабын. Ийэм Сахаяна Руслановна оҕо көрөн олорор, оттон аҕам Покровскай куорат баһаарынай чааһыгар баһаарынайынан үлэлиир. Бииргэ төрөөбүт эдьиийим Марина ХИФУ 4‑c кууруһун устудьуона, улахан убайым билигин аармыйаҕа сулууспалыы сылдьар. Иккис убайым Георгий быйыл оскуоланы бүтэрэн ХИФУ устудьуона буолла. Мин төрдүс кылааска таҕыстым, быраатым Алгыс иккис кылаас буолла. Оттон саамай кырабыт Айаана балтараа саастаах.
Мин кыра эрдэхпиттэн ийэм ас астыырыгар көмөлөһөр, кыттыһар этим. Онтон оскуолаҕа киириэхпиттэн, бэйэм кинигэни ааҕар буолуохпуттан ырысыаптаах кинигэлэртэн эҥин көрөн астыырга холонор буолбутум. Бэйэм туох эмит минньигэс сиэхпин баҕардахпына астыах санаам кэлээччи. Ордук минньигэс астары, туортары, пирожнайдары астыырбын ордоробун. Үһүс кылааска үөрэнэ сылдьан күн аайы араас ырысыаптары боруобалыыр буолбутум. Дьиэбитигэр Наталья Оконешникова ырысыаптаах кинигэлэрэ баар. Ол кинигэлэри арыйталаан ойууларын көрөрбүн наһаа сөбүлүүбүн. Бастаан астаан саҕалыырбар ийэм көмөлөһөр этэ, билигин ким да көмөтө суох астыыбын.
— Эркин, туорт оҥоруутун таһынан өссө тугунан дьарыктанаргын сөбүлүүгүн?
— Биһиги дьиэ кэргэнинэн айылҕаҕа сылдьарбытын, сир астыырбытын сөбүлүүбүт. Ордук балааккаҕа хонор наһаа үчүгэй буолааччы. Ону сэргэ иллэҥ буоллахпытына киинэҕэ сылдьарбытын астынабыт. Успуорт араас көрүҥнэринэн да дьарыктанааччыбыт. Мин тхэквондо көрүҥүнэн дьарыктанабын. Убайдарым эмиэ успуорка дьоҕурдаахтар. Кинилэр аҕабын кытта улуустааҕы “Аҕа уолунаан” күрэхтэһиигэ сыл аайы кыттааччылар. Онно 14 cааскын туоллаххына да кыттаҕын. 2016 сыллаахха “Тыа сирин ыала” уонна 2022 сыллаахха онлайн “Элбэх оҕолоох дьиэ кэргэн” номинацияларга кыттыбыппыт уонна улууска иккиэннэригэр бастаабыппыт. Ол кэннэ өрөспүүбүлүкэҕэ эмиэ кыттан турардаахпыт. Аҕам 2021 сыллаахха “Сыл аҕата” диэн өрөспүүбүлүкэтээҕи күрэхтэһиигэ кыттан “Лучший отец семьянин” аакка тиксибитэ. Ийэлээх аҕам барыга наһаа көхтөөхтөр. Биһиги элбэх бииргэ төрөөбүт буоламмыт кыра сааспытыттан бары да ас астыыбыт, дьиэ ис-тас үлэтигэр дьоммутугар өрүү көмөлөһөбүт. Мин төрөппүттэрбинэн киэн туттабын. Кинилэри үөрдээри туорт астыыбын уонна атыылыыбын.
— Мин саамай сөбүлүүр уруоктарым уруһуй, тулалыыр эйгэ, информатика буолаллар. Ол курдук “Мин чинчийээччибин” диэн дакылаат куонкуруһугар хаста да кыттан турардаахпын. Онно саамай улахан ситиһиим — өрөспүүбүлүкэҕэ иккис миэстэ буолуум этэ. Маны сэргэ оскуолам ыытар олимпиадаларыгар куруук кыттабын. Үөрэхпэр үчүгэйбин. Оттон саамай сөбүлүүр дьарыгым ас астааһын буолар. Ас астааһын таһынан, робототехниканы наһаа астынабын. Бу ааспыт саас Катя Сокол диэн Дьокуускайга олорор туорт оҥоруутунан дьарыктанар бэйэтэ устуудьуйалаах кондитер маастар-кылааһыгар сылдьыбытым. Онно сылдьан баран кини устуудьуйатыгар наһаа ымсыырбытым. Мин эмиэ кини курдук устуудьуйаланыахпын, туорка сыһыаннаах табаардары, бородууктаны атыылыыр маҕаһыыннаах буолуохпун баҕарабын. Ол маастар-кылааска сылдьан сникерс-бенто туорду оҥоро үөрэммитим. Дьиэбэр кэлээт сарсыҥнытыттан оҥорон саҕалаабытым уонна тута атыыга таһаарбытым. Туортарбын начаас атыылаһа охсубуттара. Биир дойдулаахтарым хайҕаан суруйбут суруктарын ааҕан бары наһаа үөрбүппүт. Бу дьоҕус биисинэһим бастакы атыылаһааччылара учууталларым буолаллар. Оскуолабар өссө трайфл оҥорон атыылыы сылдьыбытым. Өссө хаһан атыылыы аҕалаҕын диэн оҕолор ыйытааччылар. Билигин сакалааттаах уонна “Сникерс” туортары астыыбын. Барытын бэйэм оҥоробун, туордум тас бүрүйээһинигэр уонна уустук суруктаах буоллаҕына ийэм көмөлөһөөччү. Ону да сотору сатыы үөрэниэм. Улааттахпына Ренат Агзамов курдук асчыт-кондитер буолуохпун баҕарабын. Кини биэриилэрин түбэстэхпинэ көрөбүн. Урут “Кондитер дети” биэриитин ордорор этим. Билигин ол көстүбэт буолбут.
— Мин алын сүһүөх кылааска үөрэнэр буоламмын эбии дьарык билигин аҕыйах. Ол иһин сөбүлүүр дьарыкпар, туорт оҥорорбор бириэмэм тиийэр курдук. Оскуолаттан кэлээт дьиэтээҕи үлэбин оҥорон кэбиһэбин. Туордум бискибиитин күн иннинэ буһаран бэлэмниибин. Сакаас элбэҕэр биирдэ күҥҥэ алта туорду оҥорон атыылаан турардаахпын. Бырааһынньыктар иннинэ дьон ийэбэр эрийэн сакаастыыр. Ардыгар бырааһынньыктарга анаан көҥүл атыыга туортары бэлэмниибин. Оҕолорго туорт оҥорторор куонкурус баара буоллар, хайаан да кыттыам этэ дии саныыбын, оннук баҕа санаалаахпын даҕаны. Быйыл 11 сааспын туоларбар төрөөбүт күнүм туордун бэйэм оҥорор былааннаахпын.:
2025 сыл балаҕан ыйын 1 күнүттэн баантан эбэтэр микро-үп тэрилтэлэриттэн (МФО) ханнык эрэ табаары ыларга…
Полиция үлэһиттэрэ сокуоннай саастарын ситэ илик оҕолор көрүүтэ-истиитэ суох сылдьыыларын уонна буруйу оҥорууларын сэрэтэр систиэмэ…
Бүгүн, атырдьах ыйын 30 күнүгэр, офтальмология өрөспүүбүлүкэтээҕи балыыһатын салаата – офтальмология Соҕуруу Саха сиринээҕи киинэ…
Өрөспүүбүлүкэ оскуолаларыгар үөрэх дьыла саҕаланара бу кэллэ. Үөрэхтэн, оскуолаттан сайын устата тэйэ быһыытыйбыт оҕолор саҥа…
Дьокуускайга бүгүн, атырдьах ыйын 30 күнүгэр, аан бастакытын 100 км сүүрүүгэ Арассыыйа чөмпүйэнээтэ ыытылынна. Дьахталларга…
Саха сиригэр 2025 сыл балаҕан ыйын 1 күнүттэн 629 уопсай үөрэхтээһин тэрилтэтэ үлэтин саҕалыаҕа. 152…