Тупсаҕай эйгэни оҥорорго 420 мөл. солк. туһаҕа таҕыста

 Уһук Илин эрэгийиэннэригэр ыытыллыбыт IV куорат эйгэтигэр табыгастаах, тупсаҕай эйгэни оҥоруу куонкуруһугар кыттан, Саха сиригэр федеральнай бүддьүөттэн  420 мөл. солк. туһанылынна. Бу үбү пааркалары, кытыллары, болуоссаттары оҥорорго туһаналлар. Бу туһунан Ил Дархан иһинэн үлэлиир архитектура, куораты тутуу управлениетын салайааччы Любовь Папок «Диалог с властью» араадьыйа биэриигэ иһитиннэрдэ.

«Быйыл Бүлүү куоратыгар кытыл уулуссатын оҥордубут. Бу бырайыак Бүтүн Арассыыйатааҕы куонкуруска саамай элбэх баалы ылбыта. Олус кэрэ көстүүлээх, аныгылыы тупсаҕай буолла. Аллараа Бэстээххэ эбийиэккэ үлэ түмүктэнэн эрэр. Эһиил үөрүүлээх быһыыга-майгыга арыйыахпыт. Эрэгийиэннээҕи бырайыактарынан тутуллар эбийиэктэр эмиэ бааллар. Таатта Ытык Күөлүгэр хас да уопсастыбаннай сирдэри оҥорбуппут. «Манчаары оонньууларыгар» үс эбийиэк киирбитэ», — диэн кини кэпсээтэ.

Биир сүрүн ситиһиинэн Булуҥ улууһун Тиксии бөһүөлэгэр тутуллуохтаах эбийиэгинэн куонкуруска кыттан кыайыы буолар.

«Бырайыагы олоххо киллэрии чэпчэкитэ суох буолара биллэр. 2 сылынан бэртээхэй уопсастыбаннай сири киллэриэхпит диэн эрэнэбит. Ленскэй куорат «Ойуур» пааркатын иккис түһүмэҕин бырайыагынан кыайбыта. Мин бэйэм Ленскэй оройуонуттан төрүттээх буоламмын, киэн туттабын уонна үөрэбин. Эдьигээн, Чурапчы, Бороҕон, Ытык Күөл сэлиэнньэлэригэр пааркалары, кытыл уулуссалары, болуоссаттары тутуу үлэтэ барыахтаах.

Бэрэсидьиэн өйөбүлүнэн, биһиги Арассыыйатааҕы куонкурустарга кыттыыбыт кэҥээтэ. Урут хааччах баар буоллаҕына, билигин нэһилиэнньэ ахсааныттан тутулуга суох, кыттар кыахтаахтар. Онон олохтоохтор куоластааһыҥҥа көхтөөхтүк кыттан иһиэхтээхтэр», — диэн Любовь Папок эттэ.

Арассыыйатааҕы куонкурустарга кыайбыт бырайыакка 20-150 мөл. солк. көрүллэр. Бу улууска тупсаҕай сирдэри оҥорорго федеральнай бүддьүөттэн көрүллэр үчүгэй көмө буолар.

Сиһилии: https://www.sakha.gov.ru/news/15095