«Тупсаҕай куорат эйгэтин үөскэтии» бырайыак кыайыылаахтара билиннилэр

РФ Тутуутун министиэристибэтэ бу сыл муус устар 21 күнүттэн бэс ыйын 12 күнүгэр диэри zagorodsreda.gosuslugi.ru платформаҕа ыытыллыбыт тупсарыллар сирдэри уонна дизайн-бырайыактары талыыга аналлаах V Бүтүн Арассыыйатааҕы онлайн-куоластааһын түмүгүн таһаарда.

Бу бырайыак РФ Бэрэсидьиэнэ Владимир Путин көҕүлээһининэн «Олоххо аналлаах инфраструктура» национальнай бырайыагынан «Тупсаҕай куорат эйгэтин үөскэтии» федеральнай бырайыагын чэрчитинэн олоххо киирэр.

Куоластааһыҥҥа Саха сирин олохтоохторо уопсайа 95641 куолаһы биэрдилэр. Бырайыактары талыыга 34 нэһилиэнньэлээх пуунтан 76 бырайыак киирбит. Кыайбыт бырайыактары олоххо киллэриигэ нэһилиэктэр федеральнай бүддьүөттэн сөптөөх үбү-харчыны ылыахтара.

«Көхтөөх кыттыыгыт иһин барыгытыгар махтал. Куорат эйгэтин тупсарыы боппуруостарыгар нэһилиэнньэ өйөбүлэ олоххо табыгастаах усулуобуйаны тэрийиигэ сүрүн оруолу оонньуур. Куоластааһын ситиһиилээхтик ааста, бары көрдөрүүлэр ситиһилиннилэр. Гражданнар көхтөөх буолууларыгар биһиги волонтердарбыт улахан оруоллаахтар», – диэн СӨ Ил Дарханын иһинэн Архитектура уонна градостроительство управлениетын салайааччыта Любовь Папок бэлиэтээтэ.

Куоластары бэрэбиэркэлээһин түмүгүнэн кыайыылаахтарынан буоллулар:

• Дьокуускай куорат — Ю.А. Гагарин аатынан искибиэр, Теплай күөл кытыла, Талай күөлгэ «Обнаженные сердца» искибиэр;
• «Жатай» куорат уокуруга — В.П. Шамшин бульвара (2 түһүмэҕэ);
• Алдан куорат — «Люби свой город» былаһаакка саҥардыыта;
• Нерюнгри куорат—  «Семейная поляна» сири тупсарыы;
• Ньурба куорат — Бүлүү өрүс кытылын бөҕөргөтүү;
• Өлүөхүмэ куорат — Кыайыы болуоссата;
• Орто Халыма куорат— Ыччат искибиэрин саҥардыы;
• Амма улууһа — И.А.Швердин аатынан искибиэр, Покровкаҕа мини-паарка,Чапчылҕаҥҥа болуоссаты саҥардыы;
• Үөһээ Бүлүү улууһа — «Сквер Матерям-героиням» зонатын тэрийии, Хомустаахха сынньанар сири тэрийии, Хороҕо «Улуу Хоро» паамытынньык сирин саҥардыы;
• Горнай улууһа — Бэрдьигэстээх сэлиэнньэтигэр байыаннай дьайыы искибиэрин тупсарыы;
• Эдьигээн улууһа — Эдьигээн бөһүөлэгэр Михаил Ефимович Николаев аатынан кытыл;
• Кэбээйи улууһа — «Дьулуур» успуорт уонна култуура паарката, Сангаар бөһүөлэгэр Ленин болуоссата;
• Ленскэй оройуон —Бэчинчэ сэлиэнньэтигэр искибиэри тупсарыы, Ленскэй куоракка Ойуунускай уулуссатын сатыы дьон сылдьар сирин сайыннарыы (2-с түһүмэх);
• Мэҥэ Хаҥалас улууһа — Майа сэлиэнньэтигэр «Ытарҕалаах» бульвар тупсаҕай сири оҥоруу, Төҥүлү сэлиэнньэтигэр «Учуутал уонна үөрэнээччи» искибиэрин тупсарыы (2-с түһүмэх);
• Мииринэй оройуона — Мииринэй куоракка «Учууталлар» искибиэр сирин тупсарыы, Удачнай куоракка болуоссата о.д.а
• Нам улууһа —Нам сэлиэнньэтигэр киин кыбаартал аллеята, Кириэс-Кытыл сэлиэнньэтигэр мини-футбол хонуутун оҥоруу;
• Таатта улууһа — Ытык-Күөлгэ «Дача» оройуонугар Сынньалаҥ уонна култуура паарката;
• Уус Алдан улууһа— Бороҕон сэлиэнньэтигэр «Лөгөй Тойон» аатынан киин болуоссат;
• Уус-Маайа улууһа —Уус-Маайа бөһүөлэгэр Алдан өрүс кытыла;
• Хаҥалас оройуона  — Мохсоҕоллоох бөһүөлэгэр 7 №-дээх бибилэтиэкэ сирэ;
• Чурапчы оройуона — Улахан Күөл сэл. Мельницкай уул. искибиэр, Хадаар оскуолатыгар успуорт былаһааккатын көһөрүү, Туора Күөл сэл. Албан аат искибиэр.