Ааптар тиксэриитэ
Турция уон куоратыгар сир хамсааһынын содулун туоратыыга, дьону быыһааһыҥҥа тас дойдуттан көмөҕө кэлбит анал бөлөхтөрү ааҕан туран, 53 тыһыынчаттан тахса киһи үлэлии сылдьар. Турцияҕа 76 дойду, 14 норуоттар икки ардыларынааҕы түмсүү көмөлөһүөҕүн биллэрбитэ. Билигин 36 дойдуттан анал бөлөхтөр кэлэн үлэлии сылдьаллар.
Турция Өрөспүүбүлүкэтин бэрэсидьиэнэ Реджеп Тайип Эрдоган бу уон куоракка ыксаллаах быһыы-майгы өссө үс ыйга салҕанан барыаҕын туһунан бэҕэһээ национальнай тэлэбиидэнньэ нөҥүө иһитиннэрдэ. Иллэрээ күн кини өрөспүүбүлүкэҕэ биир нэдиэлэ кутурҕаны биллэрбитэ.
Ыксаллаах быһыыны-майгыны сэрэтиигэ уонна ол содулун туоратыыга управлениетын кэлиҥҥи дааннайдарынан, быыһааччылар тоҕус тыһыынчаттан тахса киһини дьиэлэр сэмнэхтэриттэн быыһаабыттар. Сир хамсааһынын түмүгэр, бэҕэһээ киэһээҥҥи дааннайынан, 5894 киһи өлбүтэ, 34,8 тыһыынчаттан тахса киһи эчэйбитэ билиннэ.
— Биһиги судаарыстыбабыт бу күннэргэ сүүс сыллаах устуоруйатыгар биир улахан алдьархайы көрүстэ. Бу биһиги эрэ өрөспүүбүлүкэбитигэр буолбакка, ыаллыы сытар судаарыстыбаларбытыгар да, аан дойду үрдүнэн да соһумар. Нэһилиэнньэ биир киһи курдук турунан сомоҕолоһон бары күүһү эмсэҕэлээбит куораттарга, дьону быыһааһыҥҥа уурда. Бары куораттарга хаан туттарыыта тохтообокко бара турар. Иллэрээ күнтэн сир хамсааһына буолуоҕуттан туһааннаах тэрилтэлэр, исписэлиистэр, тиэхиньикэ барыта тура тэбинэн үлэлииллэр. Дьону быыһааһын биир да сөкүүндэҕэ тохтообот. Биһиги бэйэбит күүспүтүн таһынан тас дойдулартан көмө кэлэ турар. Судаарыстыбалар салайааччыларыгар тус бэйэм дириҥ махталбын тиэрдэбин. Билиҥҥи туругунан, 53 тыһыынчаттан тахса исписэлиис үлэлии сылдьар. Ону таһынан баҕа өттүнэн көмөлөһөөччүлэр, түмсүүлэр бааллар. Хас чаас аайы кинилэр ахсааннара эбиллэ турар, — диэн иһитиннэрэр кини.
Сир хамсааһыныгар эмсэҕэлээбит уон куоракка барыта тыһыынчаттан тахса суһал көмө массыыната, икки санитарнай сөмөлүөт, биэс тыһыынчаттан тахса мэдиссиинэ үлэһиттэрэ күнүстэри-түүннэри дьуһуурунайдыыллар. Санатан эттэххэ, Арассыыйаттан түөрт сөмөлүөт Турцияҕа уонна Сирияҕа сир хамсааһына буолбут сирдэригэр көппүтэ. Турцияҕа сүүс киһилээх анал бөлөх кэлбитэ. Ол иһигэр аэромобильнай балыыһаҕа үлэлиир 40 мэдиссиинэ үлэһитэ.
Бүгүн, ахсынньы 21 күнүгэр, өрөбүллээҕи Оһуокайбытыгар Эҥсиэли түмсүүтүттэн инники кэскиллэрбит, ыччаттар киирэн алгыстаах Оһуокай түһүлгэтин…
Оо, улуу көстүү! Очуос таас үрдүттэн харах ыларынан улуу өрүс иэнэ нэлэһийэр, халлааны кытта силбэһэн,…
2023 сыллаахха Былатыан Ойуунускай аатынан Саха тыйаатырыгар үлэлии кэлбит кэнники көлүөнэ “щепкинэцтэри” көрөөччүлэр хайыы үйэ…
Киһи аймах туой иһити неолит кэмиттэн, саҥа таас үйэттэн оҥостор, туттар буолбут. Саха омук даҕаны…
2021 сыллаахха түөрт оҕолоох Даниловтар дьиэ кэргэн Уһук Илиҥҥи ипотека бырагырааматыгар киирсэн уһаайба атыыласпыттара, «Килбиэнстрой»…
Хаһыаппыт бүгүҥҥү ыалдьыта, дьоруойдуу быһыы, бойобуой доҕордоһуу диэн тугун бэркэ билэр, биһиги биир идэлээхпит, кэллиэгэбит,…