Ааптар хаартыскаҕа түһэриитэ
Бэс ыйыгар Стамбул куоракка “Түһүлгэ” саха култууратын бэстибээлэ буолан ааста. Бу бэстибээли Турцияҕа олорор ыччаттар тэрийэн ыыттылар.
Тэрийээччилэртэн биирдэстэрэ, Саха сирин биир биллэр хомусчута Алдан Рожин иһитиннэрбитинэн, бу тэрээһин саха култууратын тас дойдуга көрдөрөр сыаллаах-соруктаах ыытыллыбыт.
— Бу тэрээһини саха култууратын көрдөрөр, атын норуокка билиһиннэрэр сыаллаах тэрийбиппит. Маннык тэрээһини бириэмэтигэр ыыттыбыт дии саныыбын. Билигин дойдубутугар буола турар быһылааннарынан тас дойдуларга Арассыыйа үгүс култууралааҕын, биһиги дойдубутугар араас омук биир сомоҕо буолан олорорун көрдөрөр наада. Тэрээһиҥҥэ Саха сирин ыччатын таһынан Турцияттан, Азербайджантан, Узбекистантан, Киргизияттан, Арменияттан ыалдьыттар кэлэн барбыттара. Ыалдьыттарбыт астыннылар, саха култууратын олус сэргээтилэр, маннык тэрээһини өссө ыытыҥ диэн сүбэлииллэр, — диэн этэр кини.
Стамбул олохтооҕо Хамза Сойсал: “Бу маннык тэрээһин буоларын истэн олус үөрбүтүм. Бэйэм Саха сиригэр 90-с сыллардаахха баран олоро сылдьыбытым. Саха сирин дьонун көрсөн, ырыатын-тойугун истэн, оһуохайдаан ахтылҕаммын таһаардым. Бу маннык тэрээһин ыытыллара сүрдээх суолталаах. Култууралар алтыһыылара хаһан баҕарар норуоттары сомоҕолуур”, — диэн иһитиннэрэр кини.
Бэстибээл тэрийээччилэрэ тэрээһин аатын туһунан этэллэригэр: “Саха киһитигэр сайын ыһыах кэмигэр түһүлгэлээн олоруу наһаа улахан суолталаах. Ол иһин бэстибээлбитин “Түһүлгэ” диэн ааттаабыппыт”, — диэн бэлиэтииллэр.
Тэрээһини Алдалена Охлопкова уонна Үмит Шаһин сахалыы, туроктыы тылынан иилээн-саҕалаан ыыттылар. Алдан Рожин хомуска оонньоон көрөөччүлэр куттарын тутуон тутта. Саха ырыатын-тойугун, хомуһун таһынан туроктыы, азербайджанныы ырыалар ылланнылар. Тэрээһин кыттыылаахтара саха национальнай оонньууларыгар күрэхтэстилэр. Ол курдук мас тардыһыытыгар, ойбонтон уулааһыҥҥа, хары баттаһыытыгар бэйэлэрин холонон көрдүлэр. Кыргыттар уһун суһуох куонкуруһугар кытыннылар. “Түһүлгэ” оһуохайынан уонна флеш-мобунан түмүктэннэ.
Ааптар хаартыскаҕа түһэриилэрэ
Нерюнгри оройуонугар буолуохтаах Олоҥхо ыһыаҕар эрдэттэн тиийээри, от ыйын 2 күнүгэр хайы-үйэ массыыналар субустулар. Хайдах…
Бу күннэргэ социальнай ситимнэринэн Дьокуускай куораттан Аллараа Бэстээххэ паромунан айаннаан иһэр пассажирдар Өлүөнэ өрүскэ сэлээркэ тохтон…
Ааспыт нэдиэлэҕэ ДНӨ уонна Белгород уобалаһын тирэх пууннарын үлэһиттэрэ Саха сирин байыастарыгар 188 аадырыстаах баһыылканы…
Электроннай табахтан, вейптан аккаастаныы "Давай бросать" диэн марафон саҕаланна. Биир санаалаахтар никотинтан тутулуктаах буолууну бохсорго…
"Буойун" киин «ВОИН.КИНО» бырайыагы билиһиннэрдэ. "Буойун" киин бырабылыанньатын бэрэссэдээтэлэ, Госдума дьокутаата, ЛНӨ дьоруойа Виктор Водолацкай…
Бүгүн үс үллэр үөстээх Өлүөнэ эбэ күнүгэр Хаҥалас улууһун олохтоохторо тахсаннар кытылы бөхтөн-сыыстан ыраастаатылар. …