ЯСИА хаартыската.
Аллараа Бэстээххэ тимир суол кэлиэҕиттэн, өрөспүүбүлүкэ олохтоохторо арыый да удамыр сыанаҕа пуойаһынан Владивостокка, Нерюнгрига, Благовещенскайга, Алдаҥҥа, Хабаровскайга, Иркутскайга, Улан-Удэҕэ, Читаҕа, Томмокко, Тындаҕа тиийэр кыахтаннылар. Пуойаһынан ханнык хайысхаларга уонна төһө үпкэ-харчыга айанныахха сөбүн «Саха сирин тимир суоллара» хампаанньаттан ыйыталастыбыт.
Сыл саҕаланыаҕыттан, үс ый устатыгар тимир суолунан 109,6 тыһ. пассажир айаннаабыт. Бу ааспыт сыл туһааннаах кэмин кытары тэҥнээтэххэ, 8,4% элбэх.
Санатар буоллахха, 2024 сыл устатыгар «Саха сирин тимир суоллара» хампаанньа өҥөтүнэн 423 тыһыынча пассажир туһаммыт, бу 2023 сылы кытары тэҥнээн көрдөххө, 9% элбэх.
Олохтоохтор табыгастаахтык айанныылларыгар киин куораттан Аллараа Бэстээх тимир суолун ыстаансыйатыгар диэри трансфер үлэлиир. Бү өҥөнү туһанарга кассирга тимир суол ыстаансыйатыгар диэри трансфер наадын этиллэр. Оттон интэриниэт нөҥүө атыылаһар буоллаххытына, «РЖД» ААУо саайтыгар Дьокуускайтан айанныыбын диэн бэлиэтиигит. Сайыҥҥы кэмҥэ дьону Дьокуускай куорат өрүс пуордун 3 нүөмэрдээх бириистэниттэн илдьэн биэрэллэр. Күн аайы «Рукавишников» теплоход Аллараа Бэстээххэ диэри устар. Онно тиийэн баран, оптуобуһунан тимир суол ыстаансыйатыгар диэри айанныыгыт.
Эрдэттэн ас сакаастыыр өҥө соторутааҕыта олоххо киирбит. Бу маннык өҥөнү билиҥҥитэ 317/318 №-дээх “Аллараа Бэстээх — Благовещенскай” туһаайыыга туһаныахха сөп. Ас арааһын көрөн пассажир бэйэтэ талан баран, билиэт атыылаһарыгар сакаастыыр. Ас рационун тэрилтэ саайтыгар эбэтэр «РЖД пассажирам» диэн сыһыарыыга көрүөххэ сөп. Өскө кыайан табыллыбакка, ас сакаастаабакка хааллаххына, пуойас проводнигар төлөөн, эмиэ сакаастыахха сөп. «Куурусса», «Ынах этэ», «Сибиинньэ этэ» уонна «Балык» диэн рационнарга салаат, гарнирдаах итии ас, бэчиэнньэ, килиэп, булочка, чэй, кофе, кетчуп, хартыыһа киирэр.
Үс сыллааҕыта Хабаровскайга айанныырбар дьахтар уонна эр киһи диэн билиэккэ араарыллыбат этэ. Мин оҕолоох ыалы кытта биир купеҕа түбэспитим. Онон айан устата утуйарга-турарга эрэйдээх этэ. Бэйэ-бэйэни күүтүһүү, уочарат буолара. Билигин пассажир баҕатынан билиэккэ “гендернэй бэлиэ” диэн баар буолбут: «М» — эр киһи, «Ж» — дьахтар уонна «С» — “смешанное” купе диэн. Онон каассаҕа билиэт ыларга ити өрүккэ болҕомтоҕутун ууруоххутун сөп.
Пуойаһынан айанныырга доруобуйаларынан хааччахтаах дьоҥҥо ордук улахан болҕомто ууруллар. Манна анал киин баар. Оператордар төгүрүк суукканы быһа үлэлииллэр. Ыарыһаҕы арыаллыыр киһи 8 (800) 775‑00‑00
босхо нүөмэргэ эрийэн ханна айанныырын, айан уһунун, туох көмө наадатын чопчу этиэхтээх. Нерюнгри уонна Алдан оройуоннарыттан доруобуйаларын Дьокуускайга Мэдиссиинэ киинигэр кэлэн көрдөрүөх баҕалаах үгүс буолан, пуойаһы ордорон, айан бу көрүҥүн хото талаллар эбит. Үс баксаал пандустаахтар, санитарнай хостордоохтор, ыарыһахтарга анаммыт туспа каассалардаахтар. Наадыйааччыларга кэлээскэлэри, наһыылкалары биэрэллэр.
Билигин айан-сырыы элбээн пуойастарга билиэт булар ыарахан. Онон эрдэттэн айаҥҥытын былааннанан, билиэти атыылаһа охсор ордук диэн хаасса үлэһиттэрэ сүбэлииллэр.
Сыананы ырытан көрдөххө, тарыып араастаһар. Холобур, Дьокуускайтан Томмокко диэри 1 672 солк. — 2 248 солк. Айан уһуна — 9 чаас 42 мүнүүтэ эбит.
Нерюнгри киин куораттан 799 км тэйиччи сытар. Сорох дьон Нерюнгрига диэри пуойаһынан айаннаан тиийэн баран, сөмөлүөтүнэн айанныыр үгэстээхтэр. Сыаната арыый чэпчээн биэрэр. Билигин Саха сирин соҕуруу куоратыгар 17 чаас 55 мүнүүтэнэн айаннаан тиийэҕин. Плацкарт сыаната — 2 264 солкуобай, купе — 3137 солкуобайтан саҕаланар.
Хабаровскайга икки сууккаттан ордук айанныыгын. Билиэт сыаната: плацкарт — 5 747 солкуобай, купе 8330 солкуобайтан саҕаланар. Тэҥнэбилгэ сөмөлүөт сыанатын көрдөххө, бу ыйыллыбыт сыанаттан икки бүк ыарахан.
Билигин Саха сирин олохтоохторо Владивостогунан Кытайга, Кэриэйэҕэ, Японияҕа айанныыр буоллулар. Арыый удамыр сыанаҕа Владивостокка диэри тимир суолунан бараллар. Үс суукка курдук айанныыллар. Билиэт сыаната 7 346 солкуобайтан саҕаланар.
Благовещенскай арыый чугас диэххэ дуу. Айанын уһуна 41 чаас 01 мүнүүтэ эбит. Билиэт сыаната даҕаны арыый аҕай, плацкарт — 4 848 солкуобай, купе — 6 981 солкуобайтан саҕаланар.
Маны таһынан, Аллараа Бэстээхтэн Читаҕа, Улан-Удэҕа, Иркутскайга айанныахха сөп.
Бу матырыйаалбын оҥорорбор “Саха сирин тимир суоллара” АХ саайтын уонна “Под стук колес” диэн тэрилтэ ыам ыйынааҕы-бэс ыйынааҕы 3 (030) №-дээх сурунаалын туһанным. Сурунаалга суруллубут айан төлөбүрүн чахчыларын хампаанньа Дьокуускай куораттааҕы салаатын кассира Ангелина Инкинаттан чопчулаатым. Онуоха кассир “плацкарт сыаната оннунан хаалар, оттон купе сыаната миэстэ хааларыттан тутулуктаах. Ол эбэтэр, миэстэ аҕыйах буолар түбэлтэтигэр, ыйыллыбыт сыана үрдээн биэрэр” диэн быһаарда.
Дьэ, онон сыта-тура толкуйдаан баран, пуойаһынан айаны талан, баҕалаах куораттаргытыгар тиийэн сынньанан, дуоһуйа күүлэйдээн, күүс-уох ылынан кэлэргитигэр баҕарабыт.
— Үлэһит атын тэрилтэҕэ көһөөрү уурайыан баҕарар. Ол иһин кини уоппускатын атын тэрилтэҕэ ылаары (илдьэ бараары)…
Бүгүн, бэс ыйын 8 күнүгэр, Соҕуруу Африкаҕа Comrades Marathon диэн ультрамарафон 98-с төгүлүн ыытыллыаҕа. Манна…
Бу күннэргэ «Создано на Дальнем Востоке» норуоттар икки ардыларынааҕы креативнай индустрия пуорума киэҥ далааһыннаахтык буолан…
Дьокуускайга Өрөспүүбүлүкэ болуоссатыгар эрдэ тэлгэммит газон сатаан үүммэтэҕинэн сибээстээн, бэдэрээттиир "Сэттэ" тутуу хампаанньата газону уларытар…
Аҕыйах хонуктааҕыта Үөһээ Бүлүүгэ "Бүтэһик чуораан" бырааһынньыгар Гоша Васильев-Джида "Сүрэхпит тэбэрин тухары" ырыатын толорор уолчаан…
СӨ Баһылыгын дьыалаларын управлениета уонна СӨ Бырабыыталыстыбата Дьокуускайга Өрөспүүбүлүкэ болуоссатыгар оҕо эчэйбит быһылаанынан маннык иһитиннэрэр:…