Туристическай хомууру киллэриэхтэрин баҕараллар

Эрэгийиэннэргэ туристическай хомууру киллэрэн, саҥа пааркалары, фонтаннары, бэлэсэпиэт уонна сатыы киһи сылдьар суолларын тутар былааннаахтар. Арассыыйа субъектарыгар маны 2025 сылтан көҥүллүөхтэрин сөп. Кэлэр нэдиэлэҕэ сокуоҥҥа уларытыылары киллэриэхтэрэ диэн Объясняем.РФ суруйар.

Билиҥҥитэ курортнай хомуур Алтай, Краснодар, Ставрополь кыраайдарыгар итиэннэ Санкт-Петербург куоракка бааллар. Cокуоннай саастарын сиппит сынньанар дьон чопчу сууманы төлүүллэр, ол эрээри, бу 100 солк. тахсыбат. Киирбит үп туризмы сайыннарарга туһаныллар.

Билигин бу уопуту дойдуга барытыгар тарҕатыахтарын баҕараллар. Харчы муниципальнай бүддьүөккэ киириэҕэ, хомууру туристистическай инфраструктураны эрэ тэрийиигэ, тупсарыыга туһаныахха сөп.

“Бу курдук мэхэниисим биисинэскэ да, туристарга, эрэгийиэҥҥэ даҕаны дьэҥкэтик көстөр ньыманан буолар” – диэн РФ Экэниэмикэтин сайдыытын  миниистирэ Дмитрий Вахруков бэлиэтээбит.

Куруорт хомууруттан уратыта маннык: түһээни ыалдьыттартан буолбакка, гостиницалартан (отель)  хомуйарга этии киллэрэллэр – хас нүөмэр аайы сууккаҕа 65 солк. төлүүр буолуохтара. Ол эрээри, олохтоох былаас сууматын кыччатыан эбэтэр турист аҕыйах кэмигэр букатын даҕаны тохтотон эриэн сөп диэн суруйаллар. Билигин туристическай хомуур элбэх дойдуга баар. Арассыыйаҕа саамай намыһах диэн этэллэр.