Туризм бэстибээлигэр туристар сыл түмүгүн таһаардылар, санааларын атастастылар

Бүгүн «Арассыыйа  — мин устуоруйам» историческай пааркаҕа Туризм бэстибээлэ буолан ааста.

Урукку сылларга «Муус хайа» эрэстэрээҥҥэ туризм эйгэтигэр үлэлиир дьон бииргэ көрсөн сыллааҕы үлэ түмүгүн таһаарар, үүммүт сыл соруктарын ырытар эбит буоллахтарына, быйыл тэрээһин ис хоһооно кэҥээбит, ыытыллар пуормата сонуннук толкуйдаммыт. Ол сиэринэн кыттыылаах да ахсаана биллэ элбээбит. Ол курдук, бэлэсипиэтинэн айанныыр туристар, хайаҕа ыттар альпинистар, уунан устар дьон, наукаҕа тирэнэн чинчийиини ыытааччылар биир сиргэ мустан, бэйэлэрин хайысхаларын билиһиннэрдилэр.

Тэрээһиҥҥэ араас улуустартан туроператордар, хамыынан, сүүрүүнэн, хайаҕа тахсыынан, уунан устуунан, спортивнай ориентированиенан дьарыктанар туристар кэлэн, «Арассыыйа — мин устуоруйам» историческай паарка толору киһинэн туола түстэ. Тэрээһин кыттааччылара бэстибээли тэрийээччилэргэ «историческай пааркаҕа аан бастаан ыытыллыбыт бэстибээл үгэскэ кубулуйан, бу манна буолара ордук эбит» диэн санааларын эттилэр.