Туризм эйгэтигэр үлэлиир урбаанньыттар анал үөрэҕи аастылар  

Үлэ кыбартаалыгар икки күн устата Саха сиригэр туризм сайдыытыгар туһуламмыт үөрэх сэминээрдэрэ, маастар-кылаастар буолан аастылар.

Манна Арассыыйаҕа туризм эйгэтин араас хайысхаларыгар тахсыылаахтык үлэлии сылдьар ыалдьыттааһын боппуруостарыгар бастыҥ эспиэртэр мустан, бу эйгэҕэ цифровой технологиялары хайдах сайыннарыахха сөбүн ырытттылар, сүбэлээтилэр.

Ыалдьыттааһын индустриятын национальнай сойууһа (ОСИГ) 2019 сыллаахха  туризм эйгэтигэр территориялары сайыннарыыга үлэлэһэр соруктаах тэриллибитэ. Бу кэмиэрчэскэйэ суох тэрилтэ бэрэсидьиэнэ Алексей Волков салайан илдьэ сылдьар туризмы сайыннарыы эспиэрдэрин бөлөҕөр Газпромбааҥҥа сүбэһитинэн үлэлиир Грант Бабасян, РФ тырааныспар министиэристибэтин иһинэн Уопсастыбаннай сэбиэт бэрэссэдээтэлин солбуйааччыта Илья Зотов, туризм сайдыытын офиһын салайааччыта Юлия Железняк, Экэнэмиичэскэй сайдыы министиэристибэтин иһинэн Ис туризм сэбиэтин чилиэнэ Анна Лабазанова үлэлээтилэр.  Сойуус чилиэннэрэ  эрэгийиэннэринэн сылдьан,  креативнай урбаан сайдыытын тосхоллорун торумнууллар, туроператордары үөрэтэллэр, араас бырайыактары толкуйдуурга көҕүлүүллэр.

Икки күн иһигэр ыытыллыбыт сиэссийэлэргэ кыттыыны ылбыт дьон туризм эйгэтин  инфраструктуратын сайыннарыыга, араас тэрээһиннэри толкуйдаан, календарнай былааннары оҥорууга бырайыактары толкуйдуурга үөрэннилэр.