Дмитрий Артемьев: “Тус бэйэбэр ситиһиилэрдээх сыл ааһан эрэр”

Дмитрий Артемьев, СӨ норуодунай артыыһа, Кыыл Уола аатынан Үҥкүү тыйаатырын артыыһа:

–  Быйыл бэрт хамсааһыннаах, ситиһиилэрдээх сыл буолла тус бэйэбэр. Хамсык улугуруутун кэнниттэн элбэх гостуруол тэрилиннэ. Ол курдук, Үҥкүү тыйаатырын кытта Москваҕа Арассыыйатааҕы ыччат академическай тыйаатырыгар, Санкт-Петербурга Эрмитажка тиийэн нүөмэрдэрбин көрдөрдүм, “Пашков дьиэтигэр” Култуура сылыгар анаммыт бырабыыталыстыба мунньаҕын иннигэр оһуокай эттим. Ити кэнниттэн саха оһуокайа “Арассыыйа сүүс шедевригэр”  киирбитэ. Араас куораттарга байыаннай чаастарга саха уолаттарын санааларын көтөҕө тиийэ сырыттыбыт.

Ити курдук, бэрт үтүөтүк сылы түмүктээн иһэн, кыратык эчэйдим (Дмитрий Егорович соторутааҕыта үҥкүүлүү сылдьан илиитин эчэппитэ). Дойдубутугар бу сыл улахан уларыйыылары, долгуйуулары аҕалла. Бар дьоммор кэлэр сылга доруобуйаны уонна бэйэ икки ардыгар эйэни баҕарыам этэ. Дьоллоох буолуҥ!