ТУСКАР ТУҺАН: Киһи уутун тоҕо хамматый?

Киһи уутун тоҕо хамматый? Төһө да эрдэ ороҥҥун булан баран, сарсыарда уустуктук уһуктар буоллаххына, эн хаачыстыбалаахтык утуйбатаххын диэн миэдиктэр бэлиэтииллэр.

Бу барыта ньиэрбэни кытта ыкса ситимнээх. Күн устата тыастаах-уустаах  киинэ, төлөпүөн көрөн хараҕын сылайбыта барыта түүҥҥү уугар дьайарын умнума.  Киһи ис туругар бэйэтэ чаһылаах буолар. Ол чаһы кэһиллиитэ ууну хаммат буолууга тиэрдэр. Хаачыстыбалаахтык утуйуоххун баҕарар буоллаххына, утуйуоҥ икки чаас иннинэ тэлэбиисэр көрүмэ, төлөпүөннэһимэ.

Өскөтүн, ороҥҥор сытан баран, 15 мүнүүтэ утуйбат буоллаххына, эрэйдэммэккэ ороҥҥуттан туруохтааххын. Арыый хараҥа уокка кинигэ көрүөххүн, атын тугу эмит гыныаххын сөп. Ол кэннэ чахчы ууҥ кэлбит эрэ буоллаҕына утуйардыы оҥоһун. Оттон сарыарда уһуктаат эмискэ ойон турума. Сыта, олоро түһэн баран оронтон турар ордук.

Киһи уутун хамматыгар истириэс, тыас-уус, ньиэрбинэйдээһин тиэрдэр. Онон киэһэ ахсын холку эйгэни үөскэтэ сатаа.