ТУСКАР ТУҺАН: Сүбүөкүлэттэн минньигэс ас

Сүбүөкүлэ доруобуйаҕа олус туһалаах дииллэр. Ол эрээри, оҕолор буспут сүбүөкүлэни сиэхтэрин баҕарбаттар. Сүбүөкүлэни минньитэн, араастаан буһарыахха сөп эбит.

400 г сүбүөкүлэ, 16 г рис, 80 г дьаабылыка, 400 г иэдьэгэй, 16 г изюм, 20 г ынах арыыта, 1 сымыыт, 80 г сүөгэй.

Сүбүөкүлэни ууга буһаран, эбэтэр, духуопкаҕа бүскүтэн баран, ыраастаан, ортотунан оҥо хаһабыт. Дьаабылыканы түөркэлээн баран, илдьиритиллибит иэдьэгэйи, буспут риһи, сымыыты, изюму, арыыны кытта булкуйабыт. Бу маассанан сүбүөкүлэлэри толорон баран, үрдүгэр сүөгэй кутан, арыылаах иһиккэ олордон, духуопкаҕа 20-30 мүнүүтэ буһарабыт.

Буспутун кэннэ, үрдүгэр сүөгэй, грецкэй эриэхэни бытарытан, кутан биэрэбит. Бу бүлүүдэни минньигэс десерт курдук ууран, киэргэтэн биэриэххэ сөп. Саахара суох эрээри, дьаабылыкалаах, изюмнаах буолан, минньигэс, ристээх, иэдьэгэйдээх буолан, тотоойу. Элбэх белоктаах, клетчаткалаах, иҥэмтиэлээх, туһалаах ас.

Сүбүөкүлэ хаан баттааһынын түһэрэр, холестерины намтатар, быар сыаланарын, килиэккэтэ алдьанарын тохтотор. С битэмииннээх, беталаин диэн антиоксиданнаах буолан, организмҥа иһиини бытаардар. Элбэхтик сиир буоллахха, саахардаах диабеты, бэл, искэн килиэккэлэрэ элбииллэрин тохтотор кыахтаах. Маны тэҥэ, оһоҕоско, искэ-үөскэ олус туһалаах. Онон диетологтар сүбүөкүлэни күннээҕи аска хайаан да киллэрэргэ сүбэлииллэр.