Тускар туһан: Төбө эмин иһиинэн үлүһүйүмэҥ!

Билигин магнитнай буурҕалар үгүстүк түһэллэринэн, эдэр да саастаах дьон төбөлөрө сотору-сотору ыалдьыан сөп.

Төбө ыарыытыгар үгүстэр пенталгин, анальгин курдук түргэнник ыарыыны аһардар эмтэр быраас анааһына суох мээнэ иһэллэр. Быраастар бэлиэтииллэринэн, ыйга уонтан элбэхтэ төбө ыарыытын эмин иһэр буоллаххына, ыарыыны олохсутан кэбиһиэххин сөп.

Төбө ыарыытын эмэ төбө ыарыытын биричиинэтэ буолуон сөп. Ол түмүгэр ыарыы сотору-сотору хатыланыан сөп. Онон төбө ыалдьар түгэнигэр эмискэ ойон турартан, хамсаныыттан, ыараханы көтөҕүүттэн туттунуҥ. Мүлүгүр уу иһэр наада. Арыый холкутаан баран хаан баттааһынын кээмэйдиэххэ сөп. Ол эрэ кэннэ, быраастан сүбэлэтэн баран эми-тому иһэр наада.