ТУСКАР ТУҺАН: Уматыгы сөпкө кэмчилиэҕиҥ

Ньиэп сыаната хамсаабытын үрдүнэн, уматык сыаната уонча сылы быһа тохтоло суох үрдээн иһэр, онон уматыгы кэмчилээһин боппуруоһа сылтан сыл аайы сытыырхайар. Бэнсиин ороскуотун биллэ кыччатар, ол аата үбү-харчыны кэмчилиир хас даҕаны судургу ньыма баар. Эспиэрдэр сүбэлэрин ааҕыҥ.

Массыынаны сыыйа ыыт

Ордук элбэх уматык массыына миэстэттэн сытыытык хоҥнууга баранар. Ыарахан уйуктаах массыынаны миэстэтиттэн хамсатарга кэмчилээһин өттүттэн саамай табыгаһа суох эрэсиим туттуллар: мотуор үрдүк оборуоттаах уонна намыһах передачалаах буолар. Бу кэмҥэ мотуорга ноҕурууска улаатар. Быстах тохтобуллардаах тэтиминэн айаннаан, сытыытык тохтоон, эмиэ уматыгы бараамаҥ. Инники иһэр массыынаттан ырааҕы тутуһа сатааҥ уонна  эрдэтинэ бытаараргыт наада.

Ордук таһаҕастан босхолонобут

Массыынаҕа ордук таһаҕас – уматык ордук ороскуота. Төһөнөн? ADAC кулууп маннык дааннайдары аҕалар: 100 кг ахсын уматык ороскуота 100 км 0,3 лиитирэнэн улаатар. Бастатан туран – багажнигы бэрээдэктээҥ. «Омывайкалаах» уонна атын тэхиниичэскэй убаҕастардаах канистралар, үнүстүрүмүөннэр, щеткалар уо.д.а. – бу барыта ыйааһын эбэн, массыынаҕытыгар эбии ноҕуруусканы үөскэтэр. Сорох маллары, наадата суохтары дьыл кэмиттэн көрөн хомуйуохха сөп.

Муусуканы араар

Уопсайынан, массыынаҕа ханнык баҕарар уотунан үлэлиир тэрил, эһиги «өстөөххүт», тоҕо диэтэххэ, генераторга ноҕуруусканы улаатыннарар, ол түмүгэр уматык ороскуота элбиир. Онон аудиосистеманы эмиэ араарабыт. Оттон фараларга кэллэххэ – күнүс айанныыр буоллаххытына, массыынаҕыт күнүскү сырдатар фаралаах буоллаҕына, чугаһы сырдатар уоту буолбакка, ону туһанаргыт ордук.

Аэродинамиканы тупсарыҥ

Массыына салгыны «хайытан» айанныырыгар чэпчэки ньыма. Масыына үрдүгэр багажник аэродинамиканы биллэ мөлтөтөр, ону таһынан эбии уоттар, штатнайа суох «брызговиктар», салгын киллэрээччилэр курдук ханнык баҕарар таска тахсан турар элэмиэннэр тырааныспар тыалы хайытар коэффициенын улаатыннараллар, онтон сылтаан уматыгы «сиирэ» эмиэ элбиир.

Массыынаҕын өрөмүөннээ!

Салгын уонна уматык фильтрдарын, чүмэчилэргин уларыппатаҕыҥ ыраатта дуо? Оччоҕо эһиги уматыккыт ороскуота массыынаҕытын кэмигэр көрдөрөр кэминээҕэр элбэх ороскуоттаах буолуоҕа. Өрөмүөҥҥэ тырааныспары көрдөрүүтэн аккаастанымаҥ, өрөмүөн наада буоллаҕына – өрөмүөннэтиҥ.

Эспиэрдэр суруйбут бу судургу ньымаларын тутустахха, «уматык ороскуотун 15% кэриҥэнэн кыччатыахха» сөп диэн быһаараллар.