ТУСКАР ТУҺАН: Уот кыһыл Ат сылыгар дьоммутугар тугу бэлэхтиибит?

Саҥа дьыл – саха дьонун биир саамай күүтүүлээх уонна тапталлаах бырааһынньыга. Бу кэмҥэ үгүстэр чугас дьонноругар бэлэхтэри эрдэттэн анаан-минээн атыылаһаллар, оттон сорохтор бырааһынньык үгэнигэр сөптөөх бэлэҕи көрдүүр түбүккэ түһэллэр. Кэлэн иһэр 2026 сыл — Илиҥҥи халандаарынан күүс-уох, эрчим, айар-тутар кыах бэлиэтэ — Уот кыһыл Ат сыла. Онон бүгүн биһиги  ураты сылга төрөппүттэргэ, оҕолорго, биир идэлээхтэргэ тугу бэлэхтиэххэ сөбүн туһунан сүбэ-ама биэрэбит.

Саҥа дьыллааҕы бэлэх — көннөрү мал эрэ буолбатах, бастатан туран болҕомто, сылаас сыһыан уонна таптал бэлиэтэ. Ол иһин бэлэх таларга дууһалыын сыһыаннаһыахха, киһи интэриэһин, баҕатын учуоттуохха наада.

Төрөппүттэргэ – сылааһы уонна болҕомтону

Күндү дьоммутугар — ийэҕэ уонна аҕаҕа бэлэх таларга сүрүнэ кинилэр сынньалаҥнарын, доруобуйаларын, уйгулаах олохторун туһунан толкуйдуур тоҕоостоох.

• Истиҥ бэлэхтэр: Тыйыс тымныылаах кыһыммытыгар ичигэс халаат, сымнаҕас cуорҕан эбэтэр сыттык, натуральнай түүттэн оҥоһуллубут былаат эбэтэр унтуу үөрүүнү эрэ аҕалыа.
• Доруобуйаҕа туһалаах: Кырдьаҕас дьоҥҥо этин-сиинин чэбдигирдэр массажердар,  салгыны ыраастыыр тэриллэр эбэтэр санаторийга путевка бастыҥ бэлэҕинэн буолуо.
• Өйдөбүнньүк бэлэхтэр: Дьиэ кэргэн хаартыскаларыттан хомуллубут кэрэ ойуулаах фотоальбом, эбэтэр хаартыскалары уларыта тутан көрдөрөр цифровой фоторамка күндү өйдөбүнньүгү хаалларыа.

Оҕолорго – үөрүүнү уонна сайдыыны

Оҕолор Саҥа дьылы өссө күүскэ күүтэллэр. Кинилэргэ бэлэх талар — улахан эппиэтинэс.

• Кырачааннарга (1-5 саастаахтарга): Сайдан иһэр оҕоҕо толкуйдуур дьоҕуру сайыннарар  оонньуурдар (конструктордар, мозаикалар), сахалыы остуоруйалардаах, хоһооннордоох кинигэлэр олус туһалаах буолуохтара.
• Оскуола саастаах оҕолорго: Билигин оҕолор көмпүүтэр технологиятын сэҥээрэллэр. Смарт-чаһы, үчүгэй хаачыстыбалаах наушник, эбэтэр дьиэ кэргэнинэн оонньуур остуол оонньуулара үөрүүнү аҕалыахтара. Уот кыһыл Ат сылыгар сөп түбэһиннэрэн, көхтөөх сынньалаҥҥа уонна успуордунан дьарыктанарга анаан хаҥкы эбэтэр хайыһар бэлэхтиэххэ сөп.
• Улахан оҕолорго: Устудьуоннарга уонна үрдүкү кылаас оҕолоругар кинилэр интэриэстэринэн сирдэтиэххэ наада: кинигэ, киинэҕэ билиэт, араас куурустарга (холобур, омук тыла) сэртипикээт эбэтэр сөбүлүүр бөлөҕүн кэнсиэригэр билиэт.

Доҕотторго уонна биир идэлээхтэргэ – ытыктабыл бэлиэтэ

Үлэлэһэр дьоҥҥутугар уонна доҕотторгутугар бэлэх сэмэй, ол эрээри сонун буолуон сөп.

• Туһалаах сувенирдар: Кэрэ быһыылаах уруучука, былаанныыр блокнот, үлэ остуолун киэргэтэр кыра статуэтка (сыл бэлиэтэ — ат ойуулаах буолуон сөп).
• Минньигэс бэлэхтэр: Үчүгэй хаачыстыбалаах сакалаат, кофе эбэтэр чэй набора, сахалыы үүнээйиттэн оҥоһуллубут барыанньа эбэтэр мүөт.
• Бэлэх сэртипикээтэ: Ханнык эрэ маҕаһыыҥҥа, успуорт саалатыгар эбэтэр косметика салонугар сэртипикээт бэлэхтээн, киһи бэйэтэ баҕарбытын таларыгар кыах биэриэххитин сөп.

Сахалыы тыыннаах бэлэхтэр – ураты суолталаах

Кэнники кэмҥэ олохтоох оҥорон таһаарааччылар табаардара улаханнык сыаналанар буолла. Сахалыы тыыннаах бэлэхтэр кими баҕарар үөрдүөхтэрэ.

• Сахалыы киэргэллэр: Үрүҥ көмүстэн эбэтэр алтантан оҥоһуллубут бастыҥа, илин кэбиһэр,  харысхаллар — бу үйэлээх, кэрэ өйдөбүнньүк.
• Сиэлтэн оҥоһуктар: Уот кыһыл Ат сылыгар сылгы сиэлиттэн өрүллүбүт дэйбиир, сэлээппэ, суумка, кыбытыылаах хаппар эбэтэр араас киэргэллэр ордук суолталаах бэлэх буолуохтара.
• Саха быһаҕа: Эр киһиэхэ анаан саха норуотун киэн туттуута — саха быһаҕа бастыҥ бэлэх.
• Саха аһа-үөлэ: Күндү дьоҥҥутун доруобуйаҕа туһалаах саха аһынан үөрдүөххэ сөп: сылгы этэ, балык арааһа, куобах, кус.

Түмүктээн эттэххэ, бэлэх сүрүнэ — сыаната буолбатах, киниэхэ иҥэриллибит болҕомто, дууһаттан тахсар истиҥ сыһыан. Кэлэн иһэр 2026 сылынан! Дьоллоох буолуҥ!

Оттон Уот кыһыл Ат сылыгар Илиҥҥи гороскоп тугу сипсийэрин «Эдэр саас» саайтка киирэн ааҕыҥ:
https://edersaas.ru/2026-syl-uottaah-at-syla-tugu-kүүtebit/