Тускул анаарыыта: Саха сиригэр күүстээх магнитнай буурҕалар түһүөхтэрэ

Саха сиригэр бэс ыйын 8-13 күннэригэр сылаас күннэр туруохтара, кэккэ улуустарынан быстах ардах түһэрэ күүтүллэр. Субуотаҕа уонна бэнидиэнньиккэ күүстээх магнитнай буурҕалар түһүөхтэрэ. Норуот синоптига Тарас Тарасов — Тускул бу күннэргэ сэрэхтээх буоларга уонна уһун айантан туттунарга ыҥырар.

Өлүөнэ өрүс уҥуоргу улуустарга сотору кэминэн салгын температурата +20, +25 кыраадыска тиийэ үрдүө, оттон түүн +8, +9 С кыраадыс буолуо. Өрөбүллэргэ быстах ардах түһэрэ күүтүллэр. Сэрэдэҕэ уонна чэппиэргэ күнүс салгын температурата +16, +17 С кыраадыска тиийиэҕэ.

Киин бөлөх улуустарга түүнүн + 14, +15С, оттон күнүс +24, +28 С диэри сылыйыа, чэппиэргэ түүн +8, +9С, күнүс +19, +22С кыраадыс сылаас. Оптуорунньукка уонна сэрэдэҕэ күүстээх ардах түһүөн сөп.

Бүлүү бөлөх улуустарыгар күнүс +27, +28С кыраадыс, түүн +13, +14 С буолуоҕа. Сэрэдэҕэ-чэппиэргэ +11, +12 С, оттон күнүс +22, +26С тиийиэ сылыйыа. Бу өрөбүлгэ уонна сэрэдэҕэ ардах түһэрэ күүтүллэр.

Соҕуруулуу-арҕаа улуустарга күнүс +24, +25 С, түүн +8, +10 С кыраадыс. Оптуорунньукка уонна сэрэдэҕэ ардахтыа. Сэрэдэ уонна чэппиэр күн күнүс  +21, +25 С, түүн +10, +13 С кыраадыс буолуоҕа.

Өймөкөөн улууһугар сөрүүн, салгын температурата түүн +3, +5 С, күнүс +18, +19 С. Сэрэдэҕэ уонна чэппиэргэ түүн +2, +3 С уонна күнүс +17, +18 С кыраадыс буолуоҕа. Субуотаҕа уонна өрөбүл күн ардахтыа, ону тэҥэ бэнидиэнньиккэ уонна сэрэдэҕэ быстах ардах түһэрэ сабаҕаланар.

Дьааҥы бөлөх улуустарга салгын температурата түүн +6, +14 С уонна күнүс +22, +23С буолара күүтүллэр. Сэрэдэ уонна чэппиэр күн түүн +10, +11 С, күнүс +17, +24С кыраадыс буолара билгэлэнэр. Оптуорунньукка күүстэх ардах түһүөҕэ.

Халыма-Индигиир бөлөх улуустарыгар субуотаҕа уонна өрөбүлгэ түүн +4, +8 С, оттон күнүс + 14, +17 С тиийиэҕэ. Сэрэдэҕэ уонна чэппиэргэ салгын температурата түүн +9, +11 С уонна күнүс +20, +22 С кыраадыс буолара сылыктанар.

Саха сиригэр арҕаа өттүгэр уонна Арктика улуустарыгар ордук тымныы күннэр туруохтара: сүрүннээн манна салгын температурата +2, +3 С кыраадыс туруоҕа. Бэнидиэнньиктэн салгын температура 0 С кыраадыска диэри түһүөҕэ. Сэрэдэ уонна чэппиэр диэки салгын температурата арыый да сылыйыа — түүн +1, +2 С уонна күнүс +4, +6 С кыраадыс буолуохтаах.

Бэс ыйын 8-13 күннэригэр магнитнай буурҕалар түһэллэрэ күүтүллэр. Субуотаҕа уонна бэнидиэнньиккэ 4 бааллаах, онтон атын күннэргэ 2 бааллаах магнитнай буурҕалар буолуохтара.