Тускул: «Балаҕан ыйын 4 күнүттэн эмискэ тымныйыаҕа»

Бу  нэдиэлэҕэ сатыылаабыт куйаас күннэр атырдьах ыйын биллэрбэккэ, от ыйын санатан ыллылар.

Ол эрээри күһүн бэйэтин кэмигэр үктэнэрэ аҕыйах хонук хаалла. Норуот синоптига Тускул: «Балаҕан ыйын 4 күнүттэн эмискэ тымныйыаҕа. Онон «күһүммүт бэлиэр кэлэ оҕуста дуо?» диэн улаханнык соһутарыгар бэлэм буолуҥ«, —  диэн сэрэттэ. Ол курдук, түүн +1-2 кыраадыс, күнүс саамай итийбитэ +15 кыраадыс буолуоҕа. Өссө Тускул «үүнээйигитин бу кэмҥэ хомуйан саҕалыыргыт ордук…» диэн эбэн эттэ. Биллэн турар, сылаас күннэргэ үөрэммит дьон Тускул бу сэрэтиитин улахаҥҥа ууруохтара суоҕа эрээри, итэҕэйэр дьон кууркаларгытын, бэргэһэлэргитин, ичигэс атах таҥаһын ыраатыннарбыт буоллаххытына, чугаһатан бэлэмнииргит ордуга чахчы. «Тиксиигэ балаҕан ыйын 2 күнүгэр хаардаах ардах түһэр. Ол тымныыта киин, Бүлүү эҥэр, соҕуруулуу-арҕаа улуустарыгар балаҕан ыйын 4 күнүгэр биллиэҕэ» диэн сэрэттэ.

Онон сылаас чаҕылхай күннээх сайыҥҥы күннэри баттаһан, бу өрөбүллэргэ сибиэһэй салгынынан тыыныҥ, сынньаныҥ, дьаарбайыҥ. Оттон кэлэр нэдиэлэ ортотуттан күһүннүүн дорооболоһон барыахпыт.