Тускул билгэтэ: “Быйыл сир аһа дэлэй өҥ сайына буолуо…”

Былыр билгэһиттэр өҥ сайын буоларын Үргэл Ыйы кытта алтыһыытынан билэллэр эбит.

Бу туһунан норуот синоптига Тускул  күнү-дьылы билгэлээһинигэр өрүү бэлиэтиир. “Дьэ, быйыл хайдах сайын буолуой?” диэн, үгэспинэн Тускултан эмиэ туоһуластым.

— Тохсунньу 9 күнүгэр Ый Үргэли ортотунан ааста — бу маннык аасыһыы үчүгэй өҥ сайын буоларын билгэтэ.  Тохсунньу 14 күнүгэр — Баһылайап күнүгэр былыт сыҕарыйан биэрэн, ыраас халлаан туран, элбэх сулустаах түүн үүммүтэ. Онон тойонноотоххо, норуот билгэтэ этэринэн, быйыл элбэх дьэдьэннээх, отонноох сайын буоларын күүтэбит. Быһата, сир аһа дэлэй өҥ сайына буолуо.

Тохсунньу 14 күнүгэр Ый туолбута. Бу кэмҥэ ый сири аҥаарын эргийэн кэлэр кэмэ, ол иһин ый толору сир диэки хайыһан турар буолар.  Ол иһин туолбут ый диэн буолар. Бу кэмҥэ киһиэхэ дьайыыта олус күүстээх: тугу эмэ оҥоруоххун баҕараҕын, биир сиргэ олорбот, кыыһырымтаҕай буолаҕын, ньиэрбэ мөлтүүр, ол дьайыы ордук дьахтар-аймахха биллэр. Араас быһылаан тахсар. Онон сэрэхтээх буолуҥ.

Тохсунньу 19 күнүгэр, бу өрөбүлгэ, Кириһиэнньэ Таҥараны бэлиэтиэхпит. Бу күн сүллүкүүннэр төттөрү киирэллэр. Онон уу барыта сибэтиэй буолар. Ол уунан дьиэни-уоту, сүөһү турар хотонун, бэйэни ыраастаналлар. Былыттаах күн буоллаҕына, кэлэр сайыҥҥа үчүгэй үүнүүнү күүтэбит.