Хаартыска: Ольга Пестерева түһэриитэ.
Бу нэдиэлэҕэ 1-кы Ыспааһап ардах түһэр кэмэ буолан, сэрэдэҕэ уонна чэппиэргэ ардыаҕа.
Салгыы бу күннэргэ хайдах күн-дьыл турарын норуот синоптига Тускул «Саха сирэ» саайтка анаан анааран ыытта.
— Бу нэдиэлэҕэ 1-кы Ыспааһап ардаҕыттан ураты улахан сөҥүү суох. Киин уонна Илин эҥэр улуустарга күнүс ортотунан 20 кыраадыс, киэһэ — 7 кыраадыс сылаас. 1-кы Ыспааһапка ардаан ылыаҕа. Бүлүү эҥэр улуустарга эмиэ оннук сылаас күннэр тураллар. Саха сирин соҕуруу оройуоннарыгар Алдаҥҥа уонна Нерюнгригэ сэрэдэҕэ уонна чэппиэргэ 1-кы Ыспааһап ардаҕа түһэр. Эдьигээҥҥэ, Дьааҥыга — кураан, ардах суох. Арай 1-кы Ыспааһапка кыратык ардаан ылыаҕа. Сэрэдэҕэ уонна чэппиэргэ Халыма-Индигиир улуустарыгар Ыспааһап ардаҕа түһэн ааһыаҕа. Өлөөҥҥө, Тиксиигэ ардах суох. Киин куоракка эмиэ өрөбүл күҥҥэ диэри сөҥүү түспэт. Онон отчуттарга олох саамай тоҕоостоох кэм үүннэ — кураан даҕаны, ардах да суох. Ол эрээри бу нэдиэлэ ортотугар — атырдьах ыйын 15-17 күннэригэр сөрүүкээн ылыаҕа, түүн 3-5 эрэ кыраадыс сылаас. Хаһыҥныаҕа. Онон бу күннэргэ оҕуруоккутун көрө-истэ, саба-бүрүйэ сылдьыҥ.
Атырдьах ыйын ортотугар, ол эбэтэр кэлэр нэдиэлэҕэ киин уонна Илин эҥэр улуустарга сөҥүү түспэт. Күнүс 24 кыраадыска диэри сылыйар. Бүлүү эҥэр улуустарга сөҥүү түспэт. Кэбээйигэ бастакы уонна иккис Ыспааһаптарга сөҥүүлээх. Манна атырдьах ыйын 19-22 күннэригэр тохтоло суох Таҥара ардаҕа түһэр. Өймөкөөҥҥө атырдьах ыйа — ардахтаах. Күн аайы кэриэтэ ардах кэлэ-кэлэ түһүөҕэ. Ол курдук, атырдьах ыйын 12 күнүгэр — 1-кы Ыспааһап ардаҕа биллиэҕэ. Сөҥүү түһэрэ 15 чыыһылаҕа диэри уһуоҕа. 16-18 чыыһылаларга тохтуу түһэн баран, атырдьах ыйын 24 күнүгэр диэри тохтоло суох ардыаҕа. Атырдьах ыйын 15-17 күннэригэр 3-4 эрэ кыраадыс сылыйан, хаһыҥныаҕа.
Онон Өймөкөөнтөн ураты үгүс улуустарга Ыспааһап ардахтара эрэ биллэн ааһыахтара. Уоннааҕы күннэргэ «сайыҥҥы биир күн дьылы аһатар» диир кэммит үүнэр. Онон ким оту сомсор, ким сир аһын хаһаанар. Оҕуруот аһа ситэр, үүт хойдор, кус-куобах оҕото уойар, балык хабар — алаас сахата саамай астынар дуоһуйар быйаҥ баһыллар үтүөкэннээх Ийэ сайын кэмэ кэллэ. Бар дьоммор былдьаһыктаах сайыҥҥы үтүө күннэри баттаһа ситиһиилээх күннэри баҕарабын! — диэн Тускул бэйэтин санаатын тиэртэ.
РФ Силиэстийэлиир кэмитиэтин бэрэссэдээтэлэ Александр Бастрыкин Дьокуускайга саахалланар туруктаах дьиэттэн көһөрүүгэ олохтоохтор бырааптара кэһиллибитин туһунан…
Бу күннэргэ алдьатыылаах айылҕа иэдээниттэн -- от ыйынааҕы дохсун ардах халааныттан эмсэҕэлээбит Өймөкөөн улууһун олохтоохторун…
«Мин биисинэһим» киин «Көдьүүстээх уонна күрэстэһэр кыахтаах экэниэмикэ» национальнай бырайыак чэрчитинэн олоххо киирэр «Элбэх оҕолоох…
Дьокуускай куораттааҕы силиэстийэлиир отдела итирик туруктаах сылдьан суол быраабылатын кэһэн, икки оҕо өлүүтүгэр тиэрдибит 36…
Киин куорат сөтүөлүүр сирэ сабыллыбытын туһунан Дьокуускай куорат дьаһалтата иһитиннэрэр. Онон ууга түспүт дьону быыһыыр…
«Кыталык» судаарыстыбаннай эркээйи сиргэ орнитологтар кубалаах хаас дьикти сыһыаннаһыыларын туоһулара буоллулар. Мария Владимирцева уонна Айгуль…