Тускул бүгүн киэһэ оҕуруотуттан өлгөм аһы хомуйда

Норуот синоптига Тускул оҕуруотуттан бүгүн уочараттаах өлгөм үүнүүтүн хомуйда.

— Бастакы оҕурсуубутун бэс ыйын 15 күнүгэр амсайбыппыт. Онтон ыла күн аайы кэриэтэ үүнүү хомуйабыт.

Бастакы хортуоппуйбутун бүгүн амсайдыбыт. Арассааданан олорпут буолан, үүнүү өлгөм буолсу. Номнуо бүгүн ыһаарыга амсайыыга ыллыбыт.Мантан инньэ сии сылдьыахпыт.

Помидору, биэрэһи бэс ыйын 25 күнүттэн сиэбиппит, — диэн сонунун үллэстэр Тускул.

«Тыый, олох ырааппыккыт дии. Күнү-дьылы билгэлиир киһи барытын ааҕан-суоттаан үүннэрэ сылдьарыҥ буолуо. Оккут үүнүүтэ хайдаҕый? Дьонуҥ окко хаһан тахсаллар?» — диэн ыйыппыппар, билгэһит холку бэйэлээхтик кэпсээн барда. Онон маннык кэпсэтии буолла:

— Ээ, хайахсыттар оттоон ырааттылар. Уонча күн буолла, оттообуттара. От үүнүүтэ үчүгэй. Ардах Хайахсыкка үчүгэйдик түһэн, бэркэ сылыйан, от барда да барда.

— Оттон илин эҥэр кураан, аһыҥа, от үүнүүтэ мөлтөх дииллэр дии?

— Улууспутуттан биһиэхэ эрэ бэркэ ардаан ааспыта. Биир киһибит бэҕэһээ кэпсээн күллэрдэ, «массыынам аара бадараан бөҕө буолан тиийбитин көрөн, табаарыһым «маннык курааҥҥа эн хантан бадараан буллуҥ?» диэбитигэр, «биһиэхэ курулас ардах түһэн ааста» диэн эттим. Онуоха киһим «хайахсыттар, Тускуллаах буолаҥҥыт, бэйэҕитигэр эрэ ардаҕы сакаастаан түһэрэҕит» диэччи буолла…

—— Кырдьык, ол хайдах эрэ эһиэхэ түһэрий ол?

— Ыам ыйыгар алгысчыт  Мария Герасимовалыын Эбэбитигэр киирэн алҕаан, быйаҥ сайыны көрдөһөн тахсыбыппыт. Дэлэҕэ да, мин өрүү «Ийэ айылҕаҕытыттан, Эбэҕититтэн көрдөһө сылдьыҥ» диэн этэбин буолбаат? Бэс ыйын саҕаланыыта булчуттарбыт Эбэбитигэр киирэн, андыны эмиэ кыайбыттара. Онон Эбэбит барахсан биһигини аһата, арчылыы турар.

—— Оттон эн «абааһы мунньаҕын» кэнниттэн окко киирээриҥ диэбиккиттэн, дьон ону кэтэһэр быһыылаах дии?

— «Абааһы мунньаҕа» от ыйын 13-гэр биир эрэ күн. Тыаһаама, айдаарыма, холкутук сырыт да , бүттэҕэ дии. «Бу үчүгэйи куоттарымаҥ, саамай оттуур кэм» диэбитим. Онон билигин саамай от кэмэ. 20 чыыһылаҕа диэри үчүгэй кэм. Онон бу нэдиэлэҕэ окко тахсан, тутуу быдьаһар ордук. Ити этэр 39-40 кыраадыс өҥүрүк куйаастара сатыылыа суоҕа. +30 кыраадыска тиийиэҕэ. Сөрүүн тыалынан угуттуур буолан, оттуурга саамай табыгастаах күннэр тураллар.

Тускул кэргэнинээн Елена Михайловналыын оҕуруоттарын маннык олордон саҕалаабыттар.

Билигин Тарасовтар Тускул бэйэтэ оҥорбут кыраапыгынан үүнээйилэрин аһаталлар. Дьиэлээх хаһаайын  «дьон туһанныннар, тэпилииссэлэригэр ыйаан кэбистиннэр уонна  чыыһылатын көрө сылдьан аһаттыннар» диэн бэйэтэ оҥорбут таблицаларын ыытта. Онон ким интэриэһиргээбиккэ, «Саха сирэ» хаһыат анаан билиһиннэриэҕэ.

Дьэ, ити курдук норуот синоптига Тускул салайааччы, билгэһит  эрэ буолбакка, оҕуруотчут быһыытынан номнуо өлгөм үүннүүнү ылан, быйылгы сайын үтүөтүн билэн эрэр!