Тускул: «Кириһиэнньэҕэ Дьокуускайга -18 кыраадыс тымныы буолуоҕа»

Быйылгы 2025 сыл — Иэйиэхсит сыла. Ол аата саха киһитин арчылыыр, араҥаччылыыр сыл.

Саҥа сылга үктэнэн баран, норуот синоптига Тускул Саха сирин олохтоохторун анаан эҕэрдэлээтэ уонна үөрүүлээх сонуну иһитиннэрдэ:

— Үүммүт сылы бары кэриэтэ  “Кытай гороскуоба Моҕой сыла «итинник эттэ, маннык билгэлээтэ” дии-дии бэлэмнэннигит эрээри, быйыл биһигини, саха дьонун, Моҕой сыла буолбакка, бэйэбит төрүт үгэспитин тутуһар Иэйиэхсит сыла көрө-истэ, харыстыы сылдьыаҕа. Ол онно болҕомтобутун ууран, саатар  Эргэ Саҥа дьылга бэйэбит таҥарабытыгар болҕомтобутун ууруохха дуу. Иэйиэхсит — Дьахтар таҥарата. Ол эбэтэр, киһи-сүөһү араҥаччыта буолан, кут-сүр чөл буолуутун түстүүр, холумтаммытын сылытар.

Тохсунньу саҥатыгар халлааммыт эмискэ улаханнык тымнытан соһутта. Ол эрээри кэлиҥҥи сылларга тымныыттан тэйэн хаалан, бары да сылааска үөрэнэ охсубуппут тоҕо түргэнэй? Дьиҥэр, бары да сэбиэскэй кэмнэргэ маннык тымныыны  билбит-көрбүт дьон буоллахпыт.

Ааспыт нэдиэлэҕэ киһи олорор дойдутугар  59 кыраадыс тымныы түһэн, саамай тымныы сиринэн Өймөкөөн улууһун Томторо бэлиэтэммитэ. Бэҕэһээ  -59 кыраадыс бэлиэтэнэн, оннук сиринэн Амма улууһун киинэ Амма сэлиэнньэтэ буолбута. Бөөлүүн -59 кыраадыс тымныы Хаҥалас Покровскайыгар түһэн, бу  куорат киһи олорор дойдутугар  саамай тымныы сиринэн биллибитэ. Бу түүн Саха сирин ханнык нэһилиэнньэлээх пууна маннык бочуоттаах аакка тиксэрэ биллибэт. Оттон бу күннэргэ + 42 кыраадыс буолан, өҥүрүк куйаас Мадагаскарга бэлиэтэннэ. Онон, көстөрүн курдук, аан дойдутааҕы күнү-дьылы билгэлиир киин бэлиэтииринэн, бу күннэргэ киһи олорор сиригэр саамай тымныы дойдунан Саха сирэ  буолан турар. Ол эрээри өрүү маннык тымныы буолбата чахчы. Кыһын ааттаах тымныыта ханна барыай?  Онон аҕыйах хонугу тулуйдахпытына, ол эбэтэр тохсунньу 5 күнүттэн сымнаан баран, тохсунньу ый толору сылаас буолар чинчилээх. Ороһооспо, өрүү буоларын курдук, бэрт ичигэс күннэри аҕалыаҕа. Бу күн, ол эбэтэр тохсунньу 7 күнүгэр, Дьокуускайга күнүс -28 кыраадыс, түүн -33 кыраадыс тымныы буолан үөрдүөҕэ. Тымныы полюһугар Өймөкөөҥҥө Тиихэй акыйаантан иһэр сылаас салгын номнуо биллэн эрэр. Манна аҕыйах хонугунан күнүс -36 кыраадыс тымныы буолан, бу улуус олохтоохторун санааларын көнньүөрдүөҕэ.

Дьэ, үөрдүбүччэ өссө үөрдүүм, соһуппучча өссө соһутуум дуу – Кириэһэнньэ күн Дьокуускайга баара суоҕа -18 кыраадыс тымныы буолуоҕа! Уопсайынан, тохсунньу саҥатыгар улаханнык тымныйан баран, ый бүтүөр диэри -40 кыраадыс тымныыттан намтыа суоҕа. Өбүгэ саҕаттан кэлбит билгэнэн, тохсунньу 1 күнүгэр төрөөбүт саҥа Ый олох биэдэрэ да ыйаммат гына туруору таҕыста. Бу 15 хонук устата халлааммыт улаханнык сылыйар буолбутун бэлиэтэ, — диэн  быһаарда норуот синоптига Тускул.

Дьэ, онон, доҕоттор, сыччах икки-үс күнү тулуйа түһүөххэ – саҥа үүммүт Иэйиэхсит сыла, бэйэтэ да этэринии, биһигини араҥаччылыаҕа, холумтаммытын сылытыаҕа!