Тускул сэрэтэр: «Арассаадаҕытын хаһыҥтан харыстааҥ»

Ыам ыйын 22 күнүттэн бэс ыйын 22 күнүгэр диэри — самаан сайын кэмэ.

Ол эрээри бу күннэргэ Арктика эҥэртэн тымныы салгын циклона кэлэн, Саха сирин киин улуустарыгар күүскэ тыалыран, биллэ улаханнык тымныйда. Күн күүскэ көрөр эрээри — тоҥобут. Халлаан туругун дьикти көстүүтэ! Ол да иһин норуот синоптига Тускул бүгүн «Тэтим» араадьыйаҕа анал биэриитигэр «оҕуруот аһын таһырдьа таһаарымаҥ» диэн сүбэлээтэ.

— Бэс ыйын 5, 6, 7 күннэригэр илин, киин, соҕурулуу-арҕаа, Бүлүү эҥэр улуустарга түүн 1-2 кыраадыс тымныйаары, хаһыҥ түһээри турар. Онон сааһы быһа үүннэрбит арассаадаларгытын харыстааҥ. Бэс ыйын 10 чыыһылатын кэнниттэн таһаараргыт ордук. Саха эр дьоно бары кэтэһэр андыны бултааһын бэс ыйын бастакы күннэриттэн саҕаланара да, быйыл халлаан тымныы буолан, анды хойутуу кэлэрэ буолуо, — диэн бэлиэтээтэ норуот синоптига.

Онон оҕуруоттаах дьон Тускул сэрэтиитин ылынан, арассаадаларгытын, сибэккилэргитин хаһыҥҥа былдьаппат гына дьаһанаргыт наада.