Тускул: «Сымнаҕас уонна ичигэс кыһын буолар чинчилээх…»

Бу күннэргэ норуот синоптига Тускул төлөпүөнэ оргуйа олорор.

— «Быйыл улахан тымныы кыһын иһэр үһү дии? Оннук дуо? Эн туох билгэлээххин?» диэн дьон  ыйытан аҕай эрэр. Уоскуйуҥ, быйыл сылаас, сымнаҕас кыһын иһэр, доҕоттор.  «Дьэ, ону туохха олоҕуран билгэлиигин?» диир буоллахха,  улахан суолталаах айылҕа хамсааһыннарыгар олоҕуран этэбин.

• 2025 сыл сэтинньи 7 күнүгэр саха омук билгэлиир сулуһа Үргэл Ыйы кытта олох чугаһынан алтыспыта. Өбүгэлэрбит маннык аасыһыыны «сылаас кыһын кэлэригэр» дииллэрэ. Үргэл алтыһыыта ааспыт да сылларга кэтээн көрдөххө, олох сыыстарбат этэ.
• Күн муҥутуур үрдүк 25-с циклын түмүктээтэ. Ол аата 11 сыллаах цикл (2020 сылтан саҕаланан баран, 2030 сылга диэри салҕанар) ортотун аастыбыт. Ол аата күҥҥэ эстии 2026 сылтан аччыыр. Кураан сайын түмүктэнэр, мантан ыла 2030 сылга диэри сөбүгэр сөрүүн, орто уулаах сайын үүнэр.
• Ыаллыы сытар Камчаткаҕа  500 сыл устата утуйа сыппыт  аҕыс вулкан уһуктан, биир тэҥинэн эстэн,  7 км үөһээҥҥэ дылы күлүнэн ыспахтаан, оргуйбут таас олгуолар өрүстүү уста сыталлара — дьулаан көстүү. Бу сабыдыала биһиэхэ хайаан да  охсор.
• Онон ахсынньы уонна тохсунньу ыйдар былырыыҥҥытын курдук сөбүгэр ичигэс буолуохтара. Саҥа дьыл иннигэр-кэннигэр кыратык 40-45 кыраадыс тымныйан ылыаҕа. Үгүс улуустарга -40-30 кыраадыс тымныйыаҕа. Бу сахаларга «ичигэс» дэнэр.
• Өрөспүүбүлүкэ саамай тымныы улуустарыгар Өймөкөөҥҥө уонна Дьааҥыга улаханнык тымныйыа суоҕа. Өймөкөөн диэки улахан тымныы кылгастык түһэн ааһыаҕа. Дьааҥыга  тымныы -50 кыраадыска тиийэн ылыаҕа.  Онон ичигэс,  сымнаҕас кыһын иһэр, доҕоттор.