Тустуук Константин Капрынов «Ulaanbaatar Open» турнир кыайыылааҕынан буолла

Көҥүл тустууга Саха сирин сүүмэрдэммит хамаандатын хапытаана Константин Капрынов «Ulaanbaatar Open» диэн норуоттар икки ардыларынааҕы рейтинговай сиэрийэлээх турнир кыайыылааҕынан буолла.

Күрэхтэһии Монголия Улан-Батор куоратыгар ыытылынна. Константин 70 киилэҕэ диэри ыйааһыҥҥа эрэллээхтик бастаата. Финаллааҕы хапсыһыыга Иран бөҕөһүн Алиакбар Фазлины 6:0 ахсааҥҥа кыайда. Кини түөрт хапсыһыы тухары 27 баалы бэйэтин туһатыгар сурунна, утарылаһааччыларыгар биир эрэ баалы биэрдэ.

Константины Ил Дархан Айсен Николаев телеграм-ханаалыгар чаҕылхай кыайыытынан эҕэрдэлээтэ: «Константины уонна кини тириэньэрдэрин кыайыыгытынан эҕэрдэлиибин. Саха сирэ киэн туттар!»