Тутуу көрдөрүүлэрэ

2024 сылынан “Олорор дьиэ уонна куорат эйгэтэ” нац бырайыак түмүктэммитэ. Олорор дьиэни киллэриигэ Уһук Илин эрэгийиэннэригэр Саха сирэ Приморскай кыраай кэнниттэн иккис миэстэлээх. 2024 сылга олорор дьиэни киллэрии 752,4 тыһ кв м тэҥнэстэ, ол 2023 сылы кытта тэҥнээтэххэ 6,7 бырыһыанынан элбэх. Тутааччылар былырыыҥҥы сыл түмүгүнэн сэбиэскэй кэмнээҕи рекорды куоһардылар.  

2018 сылтан кэтэх дьиэни туттуу икки төгүл элбээбит.

Билигин тутуу эйгэтигэр чэпчэтиилээх ипотека аҕыйаабытынан бу сыыппара намтыан сөп гынан баран,  тутуу тохтоон хааларын таһаарыа суохтаахпыт диэн Ил Дархан тоһоҕолоон бэлиэтээтэ.

“Быйылгы сылтан “Олоххо наадалаах инфраструктура” саҥа нацбырайыак үлэтин саҕалаата. Дьокуускай уонна Нерюнгри маастар-былааннарын таһынан күн бүгүн 23 нэһилиэнньэлээх пууҥҥа 23 маастар-былаан оҥоһулунна. Оччотугар бу нэһилиэнньэлээх пууннарга урбаан, экэнэмиичэскэй бааза сайдыыта, олохтоохтор көрдөбүллэрэ туолуоҕа”, — диэтэ Ил Дархан Ил Түмэҥҥэ отчуотун кэмигэр.