Хаартыска: саха цииркэтэ.
Инбэлииттэр аан дойдутааҕы күннэрин декадатын чэрчитинэн, Доруобуйаларыгар хааччахтаах оҕолор өрөспүүбүлүкэтээҕи реабилитационнай кииннэрэ уонна Марфа, Сергей Расторгуевтар ааттарынан Саха судаарыстыбаннай цииркэтэ «Твори добро!» диэн сыллата ыытыллар аһымал тэрээһини ыыттылар.
Бу үгэскэ кубулуйбут аһымал тэрээһин доруобуйаларыгар хааччахтаах оҕолорго көмөлөһөр, киэҥ эйгэҕэ таһаарар, кинилэр кыһалҕаларыгар уопсастыба болҕомтотун тардар, көмөлөһөр сыаллаах ыытыллар.
Бу күн сүүстэн тахса оҕо араас маастар-кылаастарга дьарыктаннылар. Бу маастар-кылаастары реабилитациялыыр киин исписэлиистэрэ уонна «Харысхал» пуонда, «Особый ребенок» түмсүү, өрөспүүбүлүкэтээҕи дьиэ кэргэн иитиитигэр көмөлөһөр киин, коррекционнай оскуола уһуйааччылара ыыттылар.
Оҕолор үөрэ-көтө Саҥа дьыллааҕы аккырыыккалары, харыйа оонньуурдарын, карнавал мааскаларын, о.д.а. оҥордулар, туойтан, быластылыынынан сыбаан, эбру ньыматынан уруһуйдаан, мыыла оҥорон, талааннарын арыйдылар. Маны тэҥэ, логопедтар, психологтар, эмтиир физкультура уһуйааччылара оонньуу ньыматынан дьарыктары ыыттылар.
Төрөппүттэрэ психологтар, логопедтар, дефектологтар, быраастар сүбэлэрин иһиттилэр, социальнай упавление, Биэнсийэ пуондатын, үлэ министиэристибэтин, уо.д.а. исписэлиистэрин консультацияларын ыллылар.
«В кругу друзей» бырагыраама киин үлэһиттэрэ, цииркэ, судаарыстыбаннай филармония, эстрада артыыстара кыттыылаах, бэрт сэргэхтик ааста. реабилитационнай киин дириэктэрэ Зинаида Максимова, үлэ, социальнай сайдыы миниистирин солбуйааччы Иннокентий Коротких, цииркэ дириэктэрэ Сергей Расторгуев истиҥ, сылаас тылларын анаатылар.
Цииркэ артыыстарын нүөмэрдэрин оҕолор тыыммакка да олорон көрдүлэр, клоуннартан күллүлэр-үөрдүлэр. «Ырыа кынат», «Дьол тыына», «Сандал» ансаамбыллар, «Харысхал» пуонда инклюзивнай хуора, ырыаһыттар Аман Анхаров, Леонид Анциферов, Василий Новоприезжай ырыаларын, үҥкүүлэрин бэлэхтээтилэр.
Кэнсиэр киин иитиллээччилэрин уонна исписэлиистэрин флеш-мобтарынан түмүктэннэ. Психолог-педагог Мария Ачикасова киин гимнин өрө көтөҕүллүүлээхтик толордо.
Дьокуускай куорат суутунан успуорт оскуолатын дириэктэригэр РФ Административнай быраабы кэһии туһунан кодексатын (АПК) 9.1 ыстатыйатын…
«Аҕа дойдуну көмүскээччилэр» судаарыстыбаннай пуонда Саха сиринээҕи филиала Хорсунун иһин уордьан уонна Суворов мэтээлин кавалерын…
Волонтердар кылааттара сыл аайы #МЫВМЕСТЕ норуоттар икки ардыларынааҕы гражданскай пуорумҥа бэлиэтэннэ. Быйыл пуорум ахсынньы 2-5…
Дьиэ подъеһын Саҥа дьылга киэргэтиини кыбартыыра хаһаайыннарын уонна салайар хампаанньа сөбүлэҥэ суох оҥордоххо 15 тыһыынча…
Өрөспүүбүлүкэҕэ байыаннай дьайыы кыттыылаахтарын 225 ыалыгар олорор дьиэни гаастыырга материальнай көмө оҥоһулунна. Бу туһунан СӨ…
«Национальные приоритеты» АНО Арассыыйа Доруобуйа харыстабылын министиэристибэтин кытта «Арыгыта суох олох» диэн арыгыга ылларыыны утары…