Тыа хаһаайыстыбатыгар туох боппуруостары дьүүллэстилэр?

Дьокуускай куоракка Муниципальнай тэриллиилэр бэрэстэбиитэллээх уорганнарын, дьокутааттарын 3-с сийиэһэ буола турар. Сийиэс үлэтин чэрчитинэн, Ил Түмэн тыа сиригэр, аграрнай бэлиитикэҕэ кэмитиэтин бэрэссэдээтэлэ Александр Атласов бэйэтин санаатын үллэһиннэ:

— Тыа хаһаайыстыбатын салаатыгар биир сүрүн боппуруоһу Дьокуускай куорат уокуругун дьокутааттара туруораллар. «Тоҕо бу куорат уокуругар баар пиэрмэрдэр федеральнай бырагыраамаларга («Агростартап», «Дьиэ кэргэн пиэрмэр хаһаайыстыбалара», «Тыа сирин кэлим сайыннарыы», о.д.а.) киирбэттэрий?» диэн.

Тыа хаһаайыстыбатын министиэристибэтин өттүттэн, мин да өттүбүттэн эппиэт барда. Ити боппуруоһу туруорсубуппут хас да сыл буолла. Билигин быраабыла быһыытынан, 50 тыһыынчаттан тахса  нэһилиэнньэлээх куораттар ити бырагыраамаларга киирбэттэр. Онон Дьокуускай куорат ити бырагыраамаларга хапсыбат. Ол эрэн, биир суол баар. Өрөспүүбүлүкэтээҕи бүддьүөттэн эбии харчы көрөн, бэйэбит бырагыраама оҥорон, чуолаан бу Дьокуускай куорат уокуругар анаан оҥоһулуннаҕына, ити кыаллыан сөп.

Иккис сүрүн боппуруос өртөөһүҥҥэ киирдэ. Бу боппуруоска ааспыт нэдиэлэҕэ Ил Түмэҥҥэ «төгүрүк остуолу» тэрийэн турабыт. Ол чэрчитинэн, өртөөһүнү наука өттүттэн үөрэтии, чинчйии ыытыллыбыта. Наука этэринэн, өртөөһүн үүнээйигэ, ходуһаҕа, сылгыга көдьүүстээҕэ дакаастаммыта. Онон биһиги бырабыыталыстыбабыт Арассыыйа бырабыыталыстыбатын бэрээдэгэр 185 №-дээх пууҥҥа уларытыы киирэригэр үлэлэһэригэр рекомендация киллэрбиппит.

Үһүс сүрүн боппуруоһунан үбүлээһин, тыа хаһаайыстыбатыгар көрүллүбүт үп-харчы кэмигэр тиийиитэ буолар.  Бырабыыталыстыбаны кытта үп уонна тыа хаһаайыстыбатын министиэристибэлэрин кытта бииргэ үлэлэһэн, кэпсэтиилэр буолбуттара, — диэн кини эттэ.