Тыа хаһаайыстыбатын өйүүр саҥа мэхэньииһимнэрин оҥороллор

СӨ Бырабыыталыстыбатын бэрэссэдээтэлин солбуйааччы Сергей Местников Ил Дархан Айсен Николаев тыа хаһаайыстыбатын сайдыытын боппуруостарыгар ыыппыт мунньаҕын түмүктэрин ырытта.

Өрөспүүбүлүкэ улуустарын баһылыктара кыттыылаах мунньахха  тыа хаһаайыстабын өйүүргэ саҥа мэхэньииһимнэри олоххо киллэрии уонна сүөһү аһылыгын бэлэмнээһин хампаанньатын хаамыытын көрдүлэр.

“Тыа хаһаайыстыбатын салаатыгар сорох боломуочуйаны улуус баһылыктарыгар биэрии кэмиттэн оруобуна сыл аҥаара ааста. Биһиэхэ кинилэр санааларын уонна этиилэрин истии суолталаах. Биһиги боломуочуйалары биэрии тыа хаһаайыстабытыгар оҥорон таһаарыы көдьүүһүгэр үчүгэй дьайыылаах  буолла диэн уопсай түмүккэ кэллибит.  Ону сыл бастакы аҥаарыгар тыа хаһаайыстыбатыгар сайдыы көрдөрүүлэрэ бигэргэтэллэр. Улуустар сүөһү аһылыгын бэлэмнээһин уонна оҥоруу бырагыраамаларыгар үлэлэрин бэйэлэрин көрүүлэринэн  күүһүртүлэр”, — диэн Сергей Местников бэлиэтээн эттэ.

«Айсен Сергеевич  быйылгы дьылга  сүөһү аһылыгын бэлэмнээһин  былаанын сүүс бырыһыан хааччыйар соругу баһылыктарга туруорбута. Биһиги улуустарга сүөһү аһылыгын бэлэмнээһин хампаанньатын ыытыыга, былаан көрдөрүүлэрин кэмигэр толорууга кэтээн көрүүнү мэлдьи ыытабыт”, — диэтэ бэрэссэдээтэли солбуйааччы.