Тыа хаһаайыстыбатын кээпэрэтиибин үлэһитэ 2 мөл. солк. уорбута билиннэ

ИДьМ сулууспатын Амма улууһунааҕы салаатын дьуһуурунай чааһыгар тыа хаһаайыстыбатын  кээпэрэтиибин салалтатыттан ынах арыыта атыылааһынтан киирбит 2 мөл.солк. кэриҥэ харчы уоруллубутун туһунан сайабылыанньа киирбит.

Суһал-ирдиир тэрээһиннэринэн холуобунай ирдэбил үлэһиттэрэ уорууга тэрилтэ 37 саастаах, урут сууттана сылдьыбыт үлэһитэ сыһыаннааҕын быһаардылар.

Силиэстийэ быһаарбытынан, уорбаланааччы сыл аҥаарын устата собуоттан арыыны ылан, улуус маҕаһыыннарынан тарҕатар эбит. Табаары атыы-эргиэн туочукаларынан тарҕатан баран, тиксэриллибит бородууксуйа ахсаанын отчуокка аччатан суруйан, оттон киирбит харчы сорҕотун бэйэтигэр ылан иһэр эбит.

РФ Холуобунай Кодексатын 158-с ыстатыйатын 4-с чааһынан холуобунай дьыала көбүтүлүннэ. Бу ыстатыйанана буруйдаах 10 сылга диэри көҥүлэ быһыллыан сөп. Силиэстийэ кэмигэр уорбаланааччыга ханна да барбат туһунан баппыысканан хааччахтыыр миэрэ ылылынна. Бу туһунан Саха сиринээҕи ИДьМ пресс-сулууспата иһитиннэрэр.