Тыа хаһаайыстыбатын миниистирэ Артем Александров Өймөкөөн улууһугар үлэлиир

Бу күннэргэ СӨ тыатын хаһаайыстыбатын уонна ас-үөл бэлиитикэтин миниистирэ Артем Александров Өймөкөөн улууһугар үлэлиир.

Балаҕан ыйын 2 күнүгэр Уус Ньараҕа көтөн тиийээт, миниистир Агробаза уонна Балаҕанааах учаастактарыгар сылдьан, Илья Стенин уонна Прокопий  Кондаков хаһаайыстыбаларын кытта билистэ.

— Пиэрмэр Илья Стенин аҕыйах сыллааҕыта тэриллибит хаһаайыстыбатыгар ынах сүөһү таһынан, сибиинньэ, ынах, куурусса ииттэр. Миниистир Артем Александров хаһаайыстыбатын саҥа сайыннаран эрэр пиэрмэргэ биир тустаах бырагыраама чэрчитинэн үлэлэһэргэ сүбэлээтэ. Оттон Прокопий  Кондаков саха сылгытын үөрдээн иитиигэ үлэлэһэрин миниистир сэргээтэ, — диэн иһитиннэрдэ улуустааҕы тыа хаһаайыстыбатын управлениетын салайааччыта  Инна Яковлева.

Тыа хаһаайыстыбатын миниистирэ Артем Александров Төрүт нэһилиэгэр сырыытын туһунан бэрэстэбиитэллээх уорган дьокутаата Октябрина Столярчик маннык иһитиннэрдэ:

— Суолталаах мунньахха сүөһү ииттэр дьон бары кэлэн атах тэпсэн олорон кэпсэттибит. “Поруом сырыыта түмүктэниэр диэри быйыл кыстыыр оккут аҥаарын тиэйэн аҕалыахпыт. Онон сүөһүгүтүн эһимэҥ, өйөбүл оҥоһуллуоҕа. Кыайан ынаххытын ииппэт дьон, кыахтаах дьоҥҥутун өйөөн, кэпэрэтииптэ тэрийэн, онно ииттэриҥ. Өрөспүүбүлүкэ үгүс нэһилиэгэр оннук гыналлар” диэн миниистир бэлиэтээн эттэ. Соторутааҕыта ынаҕым эмискэ өлөн хаалан (төрүөтэ — чаҕылҕаҥҥа оҕустарбыт), ол санаатыгар оҕустаран, быйыл сүөһүбүн барытын эһэр санаалааҕым да, от кэлэр буоллаҕына, тохтуурум буолуо.

Уопсайынан, мин эрэ буолуо дуо, үгүс ыал сүөһүтүн кыстатар ото суох буолла. Саатар оттуур ходуһам уунан туолан, бадараан быыһыгар оттуубут. Ол туох хаачыстыбалаах буолуой?  Биһиги нэһилиэкпитигэр  урукку сылларга биирдэ даҕаны  тыа хаһаайыстыбатын миниистирэ үктэнэ илик. Онон Артем Александров бэйэтинэн нэһилиэктэри кэрийэн, анаан көрсөн кэпсэтэн барбытыгар истиҥник махтанабыт. Улуус баһылыга Александр Оконешников, баһылыгы 1-кы солбуйааччы Алексей Федотов кыстыыр оппутун кэмигэр кэпсэтэ охсон (барыта үлэттэн тахсар буоллаҕа), сотору кэминэн оппут кэлэрин эрэнэ кэтэһэр буоллубут. Онон улууспут салалтатыгар махталбыт эмиэ улахан.

Бүгүн-сарсын тыа хаһаайыстыбатын миниистирэ Артем Александров Өймөкөөн, Томтор, Сордоҥноох, Үчүгэй нэһилиэктэрин хаһаайыстыбаларыгар сылдьан, түбүктээх үлэлэрин кытта билсиэҕэ, кыһалҕаларын быһаарыаҕа.