Тыа хаһаайыстыбатын бородууксуйатын оҥорон таһаарааччылар, тыа сирин олохтоохторо инвестиция кээмэйэ үрдүөҕэ диэн билэн-көрөн олороллор: кэлэр сыл судаарыстыбаннай бүддьүөтүгэр үбүлээһини өссө 2,6 млрд солк. улаатыннарыахтара, онон уопсай кээмэйэ 14,2 млрд солк. тэҥнэһиэҕэ. Икки сыл устата үүт субсидията икки төгүл улаатта диэн этэллэр. Ол курдук, тэрээһиннээх хаһаайыстыбаларга үүт субсидията 35-тэн 50 солк. диэри үрдээбитэ, кэлэр сылга өссө 10 солкуобайынан эбиллэрэ күүтүллэр.
Ил Дархан Айсен Николаев Ил Түмэҥҥэ Анал этиитигэр Саха сирин агробырамыысыланнаһын комплексын сүрүн соругунан олохтоох аһы-үөлү дэлэтии буоларын бэлиэтээтэ. Кини кэтэх хаһаайыстыбалары сайыннарыыга эмиэ болҕомто уурулларын эттэ. Ол курдук, кэтэх хаһаайыстыбалар ийэ төбөҕө 35 тыһ. солк. ылбыттара. Ити көмөтүнэн тыа сирин 9722 олохтооҕо 1,3 млрд солк. ыллылар. Кэлэр сылга субсидия 37 тыһ. солк. диэри үрдүөҕэ. Ол да буоллар, быһаарылла илик кыһалҕалар баалларын Ил Дархан бэлиэтээтэ. Бэйэ бородууксуйатынан хааччыллыы намыһах. 2024 сылга орто таһымы 54,6 быр. диэри тиэрдэр сорук турбута.
Ил Дархан өрөспүүбүлүкэ Тыатын хаһаайыстыбатын министиэристибэтэ билигин кэлбит үбү үллэриинэн эрэ дьарыктанарын, уруккулуу үлэлии олорорун сэмэлээтэ. “Үп-харчы элбэх эрээри, түмүгэ көстүбэт”, — диэтэ Айсен Сергеевич. Уонна СӨ Тыатын хаһаайыстыбатын министиэристибэтэ аһынан-үөлүнэн хааччылыыга куттал суох буолуутун штабын курдук үлэлиэхтээх диэн соругу туруорда.
Маны сэргэ хаһаайыстыбаларга бэриллэр субсидиялар олохтоох бородууксуйа эбиллиитигэр көдьүүстээх буолуохтаахтара ыйылынна. АПК өйүүр пуонда көмөтүнэн түргэнник ситэр салааны сайыннарыыга болҕомто ууруллуохтааҕын эттэ.
“Тыа сирин олохтоохторугар дириҥ махталбын тиэрдэбин, кинилэр хорсуннук туруулаһан үлэлии-хамсыы олороллорун иһин. Өрөспүүбүлүкэ күнүгэр, муус устар 27 күнүгэр, Сунтаар улууһун «Кириэстээх» ТХПК ыанньыксыта Владимир Африканович Михайлов Арассыыйа Үлэ Дьоруойун аатын ылар чиэскэ тиксибитэ”, — диэн киэн тутта эттэ.
Хаартыска: интэриниэт
Бүгүн, ыам ыйын 21 күнүгэр, өрөспүүбүлүкэ арҕаа, соҕуруулуу-арҕаа, соҕуруу улуустарыгар сөҥүүлээх, сөкүүндэҕэ 15-20 миэтэрэ түргэннээх…
Гражданскай оборуона дьыалаларыгар уонна нэһилиэнньэ олоҕор куттала суох буолуутун хааччыйыы миниистирин собуйааччы Яна Наумова киэһээҥҥи…
Күннээҕи олоҕу кытта тэҥҥэ хардыылыыр дьон түөкүттэр бааллар эбит. Аны оскуоланы бүтэрээри сылдьар оҕолорго үрдүк…
Ырыа күнүгэр аналлаах кэнсиэртэр оптуорунньукка, ыам ыйын 21 күнүгэр, Саха сирин бары куораттарыгар уонна сэлиэнньэлэригэр…
СӨ Ил Дархана Айсен Николаев Нам улууһугар оробуочай сырыытын чэрчитинэн, Хатырык олохтоохторун кытары көрсүһүү тэрийэн…
Өлүөхүмэ, Нам улуустарыгар халаан уутун содулун көрөн, киһи долгуйар, хараастар. Онон дьон-сэргэ уталыппакка эмсэҕэлээбиттэргэ бэйэтин…