Тыа хаһаайыстыбатын министиэристибэтэ Өймөкөөн улууһун отунан хааччыйыа

Саха сиригэр 10%-тан тахса от бэлэмнэннэ. СӨ Тыатын хаһаайыстыбатын министиэристибэтэ ардахтан үөскээбит халааҥҥа тыа хаһаайыстыбатын сирдэрэ эмсэҕэлээбит Өймөкөөн улууһун отунан хааччыйыа. Бу туһунан Ил Дархан Айсен Николаев «Якутия, вперед!» биэриигэ иһитиннэрдэ.

«Быйыл от үүнүүтэ үчүгэй, онон оту бэлэмнээһин этэҥҥэ бара турар. 10%-тан тахса от бэлэмнэннэ. Мин санаабар, быйыл үгэс курдук былаантан 90-95% бэлэмнэниэҕэ. Өймөкөөн улууһугар ардахтан үөскээбит халаанынан сибээстээн, биһиги олохтоох тыа хаһаайыстыбатын бородууксуйатын оҥорооччуларыгар көмөлөһүөхпүт. Сүөһү кыстыгы этэҥҥэ туорууругар Өймөкөөн улууһугар 2,5 тыһ. туонна от наада. СӨ Тыатын хаһаайыстыбатын министиэристибэтэ бу кээмэйи хааччыйары эрэллээхтик толоруо дии саныыбын», – диэн Айсен Николаев кэпсээтэ.

Ил Дархан бэлиэтээбитинэн, боломуочуйа муниципалитеттарга бэриллибитинэн сибээстээн, улуустар үгүстэрэ күүскэ ылсан үлэлииллэр. Ол курдук, үүтү бэлэмнээһиҥҥэ сыллааҕы былаан номнуо 52% туолла — бу 33 тыһыынча туонна. Ити көрдөрүү ааспыт сыллааҕар үс тыһыынча туоннаннан элбэх.